صباحكم / مساءكم نقاء وصفاء ، وحشتوني ووحشني التدوين :(
واضح لكم وضعي اللي فاضيه مشغوله بالفعل الوقت اللي افضى فيه يكون وقت راحتي واسترخاء بس وعد راجعتلكم ذي المره وبقوه كمان :)
تدوينة اليوم ماحبيت اعطيكم امال كبيره عن المنتج
واحسسكم انه يصنع المعجزات بس كانت بالنسبه ليا
تجربه جيده وحلوه كمان ..
المنتج متوفر في اغلب الصيدليات من شركة كستاليا
اسمه :
chronoderm vitamin c 10%
(CASTALIA) | انبولات فيتامين ج بتركيز ١٠٪ من كستاليا
محتويات الكرتون :
يحتوي على
١- قمعين ( القمع لاترمينه بعد ماتركبيه في المصل راح تستخدمينه في العلب الباقيه)
٢- ( ١٤) علبه من المصل ( كل علبه تبقى من ٣ ايام الى ٥ ايام حسب طريقة استخدامك )
ذُكر عن المنتج :
اثبتت الدراسات السريريه للمنتج
١- تركيبته مطوره وجديده يقلل من تجاعيد البشره
٢- مضاد للاكسده
٣- يقلل من عمق التجاعيد والبقع
٤- يحفز على تكوين الكولاجين في البشره وينقيها
٥- يجعل البشره اكثر ليونه ومرونه
المنتج خالي من :
١- الزيوت
٢- المواد العطريه
٣- الباربين
طريقة فتح المنتج :
قبل نعرف طريقة استخدامه لازم نعرف انه العلبه تحتوي على مخزنين في الغطاء الابيض نلقى مسحوق ابيض هو عباره عن الفيتامين ،
السائل اللي نشوفه ف العلبه هو عباره عن مصل محفز للفيتامين .
يعني نبرم الغطاء بالعكس لمن ينفتح المخزن اللي فوق وينزل منه الماده البودريه وبعدها نرج العلبه عشان تذوب الماده في المصل وبعدها نفتح العلبه ونستخدم السيروم بعد مانحط القمع فيه .
يحفظ في مكان بارد وجاف وبعيد عن الشمس
طريقة استخدامي :
استخدمته باكثر من طريقه وراح اذكرها كامله :
الطريقه الاولى :
بعد مااغسل وجهي بالغسول واحط التونك اجيب المصل واوزعه على وجهي بحركات دائريه واتركه لين يجف طبعا يجيك احساس انه فيه شي على وجهك وتحسي المنتج يعطي احساس التلصيق مايطول ذا الاحساس بعدها تحسي انه فيه زي الجفاف او بوصف اكثر انه البشره جالسه تنشد
الطريقه الثانيه :
بعد مااغسل وجهي بالغسول مباشرة استخدم السيروم واوزعه على وجهي بحركات دائريه راح تحسي نفس الاحساس في الطريقه الاولى
الطريقه الثالثه :
بعد مااغسل وجهي بالغسول ابخ بختين من بخاخ اربن ديكان للفيتامينات كتبت عنه تدوينه وبعدها انتظر ثواني واوزع السيروم على كل وجهي
في كل الحالات الثلاث انتظر نص ساعه وبعدها استخدم اذا كنت حابه كريم ترطيب للبشره او اي منتج ثاني انا حابه استخدمه
ملاحظات :
١- استخدمت المنتج ف البدايه مرتين في اليوم وهذا الافضل وكانت نتائجه افضل
٢- استخدمته قبل وضع المكياج بفتره ٢٠ دقيقه الى ٣٠ دقيقه .
٣- عند استخدامي للمنتج في الليل افضل مااستخدم شي بعده مدري ليش احس ابطل مفعوله 😂 لكن في النهار لا عادي اخذ راحتي واحط بعده كريم ترطيب :) < على كيفي هههههه>
٤- يوضع على الوجهه والرقبه وماتقربيه من منطقة العين يعني الحماس والفلسفه الزايده مانبغاها ياجماعه :)
رائي عن المنتج :
استخدمته في فترتين مختلفه اخر الشهور في حملي والحمدلله حسيته خفف كثير من اثار الحمل تقريبا الحمل هذا ماحسيت تغيرات خصوصا في بشرتي العاده يطلع لي حبوب وشوية تصبغات والارهاق يكون واضح من اول الحمل خصوصا لون بشرتي بالفعل الحمل هذا عنايتي كانت فايقه خاصة في بشرتي طلعت لي كم حبه بس الحمدلله راحت بدون اي اثار ، رونق ولون بشرتي ماانسحب الى في الشهر التاسع من حملي ، لاحظت الخطوط التعبيريه صارت اخف والكلف اللي في بشرتي من قبل حملي خف لونه بدرجه انا لاحظتها صح مااختفت نهائي لكن اتحسنت كثير
الفتره الثانيه : كانت بعد ولادتي بالفعل فقدت النضاره والرونق احس لوني مسحوب بالفعل الاسباب كثيره كان نومي قليل وارهاق الولاده كلها لها تاثيرها على بشرتي يعني لاتحطي املك في الفيتامين كل شي لازم يكون تكاملي النوم والاكل الكويس والعنايه المستمره كلها تاثر على بشرتك يعني مالاحظت منه تحسين في حيويه ولون بشرتي ، لكن الحمدلله كل مره يخف لون الكلف احس فيه ليونه في بشرتي واحسها مشدوده
من ناحية التجاعيد مااقدر احكم اذا انه له مفعول ملحوظ ولا بس اعتقد انه راح يحسن من منظرها والتجربه خير برهان .
لاتحطو حيلكم في منتج واحد وتقولو مالاحظنا تغير كل شي مع الاستمرار والعنايه المتكامله يفرق ودي احط لكم صوره لبشرتي قبل عنايتي المستمره وحاليا بتلاحظو فررق كبير في احد المواضيع راح احطها عشان تعرفون كيف مع الاهتمام والاستمرار راح يتحسن كل شي
المنتج سعره : في حدود ٣٠٠ ريال يكفيكم فتره طوويله باذن الله ..
واشوفكم في تدوينات ثانيه وانتو بخير،، احبكم
ليست هناك تعليقات:
إرسال تعليق