صباح / مساء الحب والرقه ..
اكثر شي اتضرر من الحمل والرضاعه الطبيعيه هو شعري يحتاج عنايه من الداخل والخارج ..
قبل شهر ونص طبقت طريقة الانفيرجن ميثود ( اطالة السعر ٤ سم في اسبوع ) وبالفعل لقيت نتيجه حلوه لكن ماكانت جدا فعاله من ناحيه التساقط صح خف لكن مو مره .. ( كتبت عنها تدوينه سابقه )
قبل اسبوعين شعري وصل لاقصى مرااحل التسااقط والجفااف جدا :(
كميه غير طبيعيه تطيح من شعري وانا اكثر شي اكرهه التساقط لاني احب كثافة شعري الحمدلله
ودائما اسعى اني احافظ على كثافته ولمعته ..
المهم وكنت قد شفت نتيجه على بنات خالي من خلطة زيوت جربوها من شيراز شخصيا ماقد تابعتها ولا عرفتها الى منهم وكان شي جدا جميل
المهم امي اخذت طريقة وصفة الزيوت وطبقتها ورسلت لي منها في علبه ..
خلطة الزيوت الفلبينيه :
مااعرف سبب التسميه والله هههههه تقدرو تسالو شيراز
طريقة الزيوت بشكل مختصر لانه تقدرو تطلعو عليها في حساب شيراز :
١- زيت لوز حلو ٤ ملاعق
٢- زيت خروع نصف كوب
٣- زيت السمسم ٧ ملاعق
٤- اكليل الجبل ٧ ملاعق
اخلطي هذي الزيوت مع بعض وخذي الكميه اللي تكفيك ودلكي فيها فروة الراس واتركيه على شعرك مده ساعتين او خمس ساعات يفضل تغطيته ببلاستيك لكن انا شخصيا ماغطيته ابدا
النتائج اللي لاحظتها :
١- ترطيب للشعر ونعومه يعني عندي شعرات طايره انا اللي صار هجدها وصارت الكيرلي ملفوفه بشكل طبيعي ومرتب ولا حظتها على شعر بنتي اكثر شي حافظ لها على طبيعة شعرها الكيرلي لكن بشكل مرتب كنت اعاني انه بيلسان شعرها جاااف وطاير وكيرلي بالفعل كلمه منكوش قليله عليه ومستحيل يتمشط لو ماكان مبلول او فيه زيت حاليا لا الشعر ملموم على بعضه وطايح وكيرلي بشكل مرتب و صار سهل تمشيطه واكتسب نعومه حلوه ..
٢- اعاني من بعض القشره في فروة شعري دائما تروح وترجع لاحظت انه القشره خفت بشكل جدا ملحوظ ..
٣- واهم نتيجه لاحظتها التسااقط بالفعل فررق مرره كثيير الحمدلله خف التساقط بنسبة ٥٠٪ ماتتخيلو فرحتي والله يوم لاحظت نتيجة التساقط..
٤- شعري صار فيه لمعه وحيويه مره حلووه..
حاليا ناويه اهتم بحبوب الفيتامين وراح اتجهه للاكل الصحي اكثر :) من يوم اهملت الحبوب اللي صرفتها ليا الدكتوره انتكست حالة شعري وصرت احس بخمول وكسل ماتوقعت ان الرضاعه الطبيعيه متعبه خصوصا اذا اهمتلي اكلك الصحي ..
عيوب الطريقه :
ممكن تكون مكلفه على البعض لوجود اكثر من نوع زيت لكن اضمن لكم تبقى معاكم فتره مرره طريله
ماتنظف بسهوله من الشعر عشان كذا استخدميها فقط مرتين ف الاسبوع وحاولي انه يكون ماعندك دوام انا شخصيا شعري مو بسرعه ينظف من الزيت لازم احس يبقى فيه اثر وارجع اضطر اتروش من بكره مره ثانيه عشان كذا احرصي على استخدام شامبو كويس وشعرك مرتاح معاه ..
ريحتها مااحسها مزعجه مره خصوصا اني متعوده على الزيوت وعلى قولتهم من بغى الدح ماقال اح هههههههه يعني مقبوله واعتقد الكل يقدر يتحملها ..
متى راح اشوف نتيجه على شعري؟
- كل شخص تفرق معاه النتيجه يعني مده ملاحظتك للنتيجه تفرق من شعر للثاني
هل هذي الخلطه فعاله بالفعل ولا خرابيط ؟
- باختصار استفاده كل شخص من اي منتج يختلف
يعني ممكن انتي ماتلاحظي نتيجه الا بعد شهر وممكن فيه بعضهم من ثالث استخدام تلاحظ نتيجه ، وبعضهم ماتلقى اي نتيجه ..
هل ضروري تكون الزيوت من المعصره ؟
- شخصيا افضل الزيوت تكون من المعصره لانها تكون صافيه مو مخلوطه بمواد ثانيه..
هل الزيت له اضرار على الشعر ؟
شخصيا اشوف كثرة استخدام الزيت تأثر على بصيلات الشعر تخليها اكثر رقه وتساعد في سقوطها
يعني اشوف مرتين ف الاسبوع كافيه جدا
لاتتركي الزيت فتره طويله على شعرك خصوصا لو كنتي من اللي دائما وباستمرار وتحط زيت اشوف ساعتين الى اربع ساعات كافيه..
فوائد الزيوت المستخدمه في الطريقه الفلبينيه للشعر :
زيت اللوز :
من اكثر الزيوت اللي احبها واعشقها سواء لشعري او بشرتي وكنت دائما استخدمه وقت الحمل لجسمي ..
فوائده :
يحتوي على فيتامين e عشان كذا يمنع التقصف ..
زيت الخروع :
قد استخدمه لرموش عيني ماشفت منه اي نتيجه تذكر فقط الرموش السفليه طولت شويا وعلى فكره ترا له ضرر على العين
فوائده :
يمنع التساقط ، يساعد في تطويل الشعر ، يعالج فروة الراس من اي مشاكل ، يمنع جفاف الشعر ..
زيت السمسم :
من اكثر الزيوت اللي استخدمها لشعري لطيف ويساعد في تطويل الشعر لكنه اذا كنتي صابغه شعرك صبغه فاتحه يقلب لك لون الصبغه
فوائده :
يسرع من نمو الشعر بشكل فعال ..
اكليل الجبل :
هو زيت مستخلص من نبته اكليل الجبل
اول مره استخدمه ولا اعرف عنه كثير لكنه ينعم الشعر بشكل جميل وفعال ..
وكانت هذي تدوينتا لهذا اليوم ،، اشوفكم على خيير ..
Instgram: sara_dream_
Email: saron1410@gmail.com
ليست هناك تعليقات:
إرسال تعليق