Inversion method / طريقة تطويل الشعر إنفيرجن ميثد ، فوائد ومضار الزيوت

My instagram

مساءكم / صباحكم نشاط وحماس 

احب في البدايه اشكر @iartos على تطرقها لكل شي جديد ، بالفعل المدونات العربيه عندنا كل مالها تصير ممله ومكرره ، حتى اثناء كتابتة تقرير عن منتج القى كم سطر فقط في التدوينه ، ماتشفى الغليل ولا تجاوب عن كل الاسئله اللي تدور في بالنا ، علما انه كثير من البلوقرز عندهم خبره كاافيه وجيده في الانجلش يقدرو يستفيدو من ذا الشي ومتابعة اي مدونه اجنبيه ، شخصيا لغتي الانجليزيه مو عاليه ابدا عشان كذا قليل اتابع بلوقرز اجانب ، مع انه جالسه اتعلم شخصيا الانجليزي وان شاءالله اتمكن منها بشكل حلو وجيد .. 

بعد القرقره اللي فوق راح اتطرق لتجربة شعري مع #inversionmethod  ومن نتائجها زيادة طول الشعر ٤ سم خلال اسبوع .. 

طريقتها :

١- زيت دافي ، تسوي فيه مساج لفروة الشعر مدة ٤ دقائق .. 

٢- تقلبين او تنكسين شعرك لمدة ٤ دقائق كمان .. 

٣- في حال حبيتي تغسلين شعرك انتظري نصف ساعه ، انا افضل يبقى الزيت 😍 . 

٤- تطبق الطريقه السابقه ٧ ايام متتاليه ، وبعدها نوقف الطريقه مدة شهر وبعدها نرجع نكرر العمليه.

 الزيت المستخدم:

زيت الزيتون لمدة يومين والايام الباقيه جوز الهند 

شعري طال ٤ سم :) 

طريقة الانقلاب : 

انا شخصيا نكست راسي وانا ع الكنبه متمدده واثناء انقلابي كنت استغل الوقت واحط زيت لوجهي على طريقة غسل الوجهه الكوريه نزلت عنها مدونه سابقه < اكثر من كذا استغلال للوقت مافيه هههههههههه

طبعا تقدرو اثناء انتظار مرور اربع دقائق تذكري وتستغفري الله او تعملي اي شي بعض البنات الله يهديهم عندها وقت تجلس بالساعات تتابع تلفزيون او لاب توب بس مافيها حيل تقابل وتهتم بنفسها مده نص ساعه في اليوم :( 

اشياء كنت اطبقها ممكن تفيدكم :

- اول ثلاثه ايام كنت على الوقت اطبق نفس العمليه كنت محدده وقت بعد السحور .. 

- اليوم الرابع اتاخرت لانو ماقدرت اسوي في نفس الوقت طبقتها الصباح .. 

- اليوم الخامس والسادس والسابع طبقتها في نفس الوقت قبل الفطور 

- اليوم السابع ماحطيت زيت الا في طرف اصبعي ومسجت لانو كانت الفروه عندي مدهنه .. 

- طوال هذي الفتره كنت امشط شعري بشكله العادي بعدين انكس راسي وامشطه وانا قالبته هذي الطريقه من زمان انا اطبقها ع شعري.. 

- لاتمشطي شعرك وانتي طالعه ع طول من الترويش خلي الشعر يأخذ وقته بعدين مشطيه وابداي بالتمشيط من تحت الى فوق .. 

- كنت اظفر شعري بعد الانقلاب ، شخصيا احس التظفير يحسن من منظر الشعر . 

- ابتعدت نهائيا خلال هذي التجربه عن مواد التصفيف وعن الاستشوار وهذي الامور نهائي لاني حبيت انها تكون فتره راحه لشعري واستعاده لحيويته علما انه عادي لو استشورتي او صففتي شعرك .. 

نصيحه اخت لكم : 

حبابيبي العازبات استغلي فرصة انه وقتك كامل ملكك ، اهتمي بنفسك ، عدلي من اكلك ، اعملي رياضه ، دلعي نفسك حتى وقت الشاور .. 

الزواج والحمل والولاده تغيير كثير منك ، في كل مره ربي يرزقك بالذريه راح تلاحظي شعرك اتغير ، ممكن لون جسمك ، بشرتك هذي كلها لو اهملتيها وانتي بنت لسا صعب بعدين تسترجعينها مع تغير الهرمونات ومع الرضاعه . لكن لو اساسك صح ومن يومك ماتعانين اي مشاكل سواء من ناحيه الشعر او البشره وقتها ماراح تتعبي بعدين ، بيصير فقط فترة العارض اللي انتي فيه وبعدين كل شي راح يتحسن ويرجع .. 

ملاحظاتي للتجربه :

شعري صار فيه ترطيب وفيه لمعة حلوه ومرتبه 

ماحسيت انه شعري لاصق في فروتي لا بالعكس حسيته منتعش وحيوي وعلى قولتهم يتنفس هههههه 

من اسبوعين لاحظت انه شعري صار يتساقط كثييير :( 

( السبب مع الصيام وقلة النوم وبرضو اتغير اكلي وكمان الرضاعه الطبيعيه كلها عوامل زادت من التساقط ) 

بعد استخدام الطريقه خف التساقط بنسبة يمكن ٢٠٪ مااعرف السبب هل هو من الزيت المستخدم او الطريقه كان لها دور فعال .. 

عيوبها :

اول مره تقلبي راسك ممكن تحسين دوخه او ثقل في شعرك 

لاحظت انه احتاج احط مرتين شامبو عشان تنظف الفروه خصوصا اخر يومين . ( اخر يوم من تطبيق الطريقه سويتها بدون زيت ) 

زيوت طبيعيه استخدمتها : 

الزيوت بشكل عام متعبه ليا شخصيا خصوصا وقت تنظيف شعري ، 

عشان كذا افضل استخدم زيوت خفيفه وتنظف بسرعه .. 

١- زيت اللوز الحلو جديا احبه سواء لبشرتي او شعري خفيف ولطيف

تمتصه البشره وينظف بسرعه من الشعر ترطيبه خفيف يناسب الشعر العادي الى الدهني 

٢- زيت السمسم عاد هذا الحب في فتره من فترات حياتي شعري صار ليفه :(

استخدمت زيت السمسم كنت في الاسبوع احط مره الى مرتين

والحمدلله استرجع شعري شويا من حيويته طبعا مع قص الاطراف المستمر والعادات الكويسه اتحسن كثيير .. 

٣- زيت جوز الهند استخدمته الفتره هذي لطيف وحلو وحبيته صراحه

لكن احس ريحته ماتطلع بسهوله من الشعر ترطيبه لفروة الراس حسيته عالي وكويس ،

كان عندي قشرة في الفروه الحمدلله خفف منها كثيير .. اتوقع القشره بسبب الجفاف :) 

محاذير عند استخدام الزيوت : 

انتبهي من كثرة الزيت تخيلي تصبين زيت ع يدك وتخلينه تحسين ان يدك مكتومه وممكن تعرق .. 

الشعر نفس الشي كثرة الزيوت تخنقه وترقق بصيلة الشعر ويصير سهل سقوطه 

دائما استخدامي للزيت يكون في حدود ملعقتين خصوصا لو بمسّج فيه الفروه وممكن اقل 

اطراف شعري ماعندي مشكله لو كثرت شوي.. 

لاتخلين الزيت يطول ع شعرك اكثر من اللزوم .. 

لاتستخدمينه بشكل مفرط الاعتدال واجب في كل الامور .. 

 البصل والثوم والمايونيز ذي خلطات مااحس لها فائده ، تكتم الشعر وتاخذ وقت ومو عمليه ابدا احس صار طبخه مو شعر :( 

الشعر يستفيد اكثر شي لما انتي تتغذين وتاكلين لكن تجيبين الشي وتصبينه فوق شعرك راح يكون استفاده بسيطه ومؤقته  .. 

ويارب تستفيدو من التدوينه واشوفكم على خير بكره باذن الله ..