صباحكم / مساءكم نشاط ،،
اظن اغلبنا همه انه تكون بشرته تلق لق وتكون صافيه خاليه من العيوب المشكله اغلبنا كسول او عنده خمول تجاهه العنايه المستمره والمكثفه..
ومن مشاكلنا ايضا نحط امالنا على منتج واحد ونتوقع انه بيكون مثل السحر ، اشوف ان المنتجات المناسبه والاهتمام والعنايه الدائمه كفيله بحل مشاكلنا طبعا مع الاكل الجيد والنوم وعدم وجود اي امراض ..
اول منتج كوري جربته صابونه البيض للمسام :)
من tony moly
عباره عن كرتونه داخلها بيضتين وحده لونها ابيض والثانيه بنيه ،،
الصابونه البيضاء : تستخدم اول ماتصحي من النوم وتغسلي فيها وجهك وتخلينها ١٥ دقيقه او اقل وتشطفيها
الصابونه البنيه : تستخدم في المساء ترغي الصابون في يدك بعدها تغسلي فيه وجهك وتشطفين
وتكملي عنايتك الدائمه ،،
الصابونتين ماتنظف الميكب ابدا ، يعني قبل استخدامها تكوني منظفه وجهك من المكياج ..
فوائد الصابونه كما ذكرو :
١-تنظف المسامات
٢-تقلص من حجمها وتبينها مشدوده اكثر .
رائي الشخصي من خلال تجربتي :
-قبل كل شي ابغاكم تعرفو ان بشرتي مختلطه منطقة التي زون دهنيه والمناطق الثانيه تكون عاديه وفي الشتاء تميل للجفاف
- مسامتي مو كبيره الحمدلله ولا كثيره فقط متركزه حول الانف والذقن فيه شي بسيط ، الصراحه مو مسببه ليا قلق كثير لكن في فترات معينه ازيد من عنايتي فيها ..
فتره استخدامي للمنتج شهر كامل وقطعتها
اول مااغسل وجهي فيها كانت بشرتي تجف بشكل مستفز علما اني ارطبها
الافرازات الدهنيه في بشرتي صارت اكثر العاده فقط لما اصحى من النوم احس انه المنطقه مدهنه لكن اغلب فتره اليوم تكون هاديه ، لكن بعد استخدامها اغلب اليوم تفرز المنطقه دهون :(
غيرت من طريقة استخدامي صرت بعد مااغسل فيها استخدم بعدها على طول غسول بيوديرما وبرضو ماانحلت المشكله
وصرت فقط اغسل مناطق المسام بالصابونه وبرضو بشرتي تكون جافه بعد استخدامها وبعد ساعه تدهن
مالاحظت اي تحسن من ناحية المسامات اللهم بعد استخدامي للصابونه احس المسام نظيفه ومشدوده يعني نتيجه مؤقته بس :|
ملاحظه :
تجربتي هذي حطيتها تحت المجهر لانه بالفعل كثير استخدموها وعجبتهم وكتبو عنها كلام حلو وكويس
يعني حطو في بالكم انه الوضع يختلف من بشره لثانيه
المنتج الثاني :
مزيل رائحه العرق
اسمه : deo شركة milke dress
تركيبة المنتج :
جل وفيه حبيبات صغيره غير واضحه .
رائحة المنتج تذكرني بالحمضيات والبرتقال او الليمون ماقدر احدد الريحه بالضبط
استخدامي للمنتج :
ريحة المنتج من الاشياء اللي خلتني اتجنبه فتره مااعرف ليش ماحبيتها ابدا لكن قررت استخدمه عشان اقدر احكم عليه
بعد ماتحطينه على منطقة الاندرارم الريحه تخف وتختفي بعد وقت بسيط..
تركيبة الجل تعطيك ايحاء ان المنطقه لزجة ومو نظيفه :( ياخذ وقت لين ينشفط الجل ، مع العلم انه يستخدم على منطقة نظيفه تمااما بس برضو مايعطيك شعور النظافه..
ماله اي فائده من ناحية التعرق وازالة رائحته ..
من ناحية التفتيح مالاحظت اي نتيجه تذكر ..
بالنسبه لتجربتي اعتبره منتج فاشل جدا مايستحق الشراء ولا يؤدي الغرض
اللي استخدموه فتره طويله لاحظتو نتيجه من ناحية التفتيح والتبيض ولا لا ؟
المنتج الثالث والاخير :
من شركة milky dress
له فوائد كثيره كما ذكرو في المنتج :
تفتيح للمناطق الحساسه ،
للركب والاكواع ،
الكلف في الوجهه ،
بشكل عام اي منطقه غامقه في الجسم ..
للركب والاكواع ،
الكلف في الوجهه ،
بشكل عام اي منطقه غامقه في الجسم ..
سبب استخدامي للمنتج :
صراحة كنت اشوف المنتج ومافكرت اشتريه
اللي صار انه في الشهرين الاخيره من حملي لاحظت انه منطقة الاندرارم ( منطقة تحت الذراع ) هيا اللي لونها اختلف تماما اتوقعت رقبتي بطني فخودي لكن ذا الحمل كان تماما مختلف :(
حسيت نفسيتي اضطربت بسبب ذا الشي ههههههههه يعني حطي في بالك انه مو كل الحوامل زي بعض ومو كل حمل بالنسبه لك متشابهه ولازم تستعدي نفسيا لكل التغيرات اللي راح تصاحبك وتحطي في بالك انها تجربه حلوه وتنتهي في فتره بسيطه :)
رائي الشخصي عن المنتج :
المنتج نفس الجل لكن سهل الامتصاص يعطي شعور بالبروده ، بعد فتره من استخدامي للمنتج لاحظت انه المنطقه صارت انعم وملساء ، من ناحية اللون كان تغير بسيط ، بعد ولادتي رجعت استخدمه بانتظام بالفعل لاحظت تفتيح بنسبة ٣٠٪ وكانت النتيجه واضحه بسبب زوال المسبب لانه سبب انه اللون غامق عندي كان بسبب الحمل
استمريت فتره ثانيه ولاحظت انه المنطقه بالفعل انعم وافتح كثير من اول ، وخلصت العلبه ومازالت نتائج الجل فعاله ، قبل يومين بديت الاحظ انه النعومه اللي كانت في فترة استخدام الجل صارت اخف طبعا افكر ارجع اشتري المنتج هذا مره ثانيه واخليه من ضمن عنايتي اليوميه ..
المنتجات سعرها رخيص بس بسبب سمعة اغلب المنتجات صارت اسعارها غاليه جدا مقارنه بحجم العلبه ونتائجها .. المتجر اللي اشتريت منه كانت من المتاجر اللي اسعارهم معقوله 💕
ليست هناك تعليقات:
إرسال تعليق