علاج الروكتان ، فوائده اثاره ، طرق العنايه بالبشرة في فتره العلاج ،وبعض الطرق لوضع المكياج ..

مساء / صباح الجمال .. 

تدوينه اليوم تخص البنات اللي مهما تعبو ع بشراتهم يحسونها ماتتحسن ومازالت مستمره في إفرازت الدهون وعندهم حبوب سواء في وجههم او ظهرهم او اي مكان .. 

حاليا اشوف كثير بنات هابين في علاج الروكتان انا مااشوف انه اي دكتور مؤهل لصرف هذا الدواء في بنات اذا طلعت لها كم حبه راحت وسوت سالفه وابي روكتان وفيه دكاترة اعتقد يسمع كلام المريض :( 

شخصيا اشوف الروكتان ينعطىدفي مرحله عمريه ماتكون وبكره لانه معروف البشره وقت المراهقة تكون تفرز دهون وتطلع فيها حبوب كثيره ،، من نظرتي الشخصيه اشوف الروكتان ينصرف بعد عمر ٢٣ سنه .. 

وقتها اذا استمرت الحبوب والدهون اشوف وقتها فكري بالروكتان اختاري دكتور كويس وثقه واتوكلي بعدها ع ربك .. 

كثير يسألون ايش هو الروكتان ؟ 

عباره عن دواء يستخدم لعلاج حب الشباب .. 

هل هو اول طريقه لعلاج حب الشباب ؟ 

طبعا لا اول الطرق استخدام مضادات ومقشرات الريتنول .. 

مين الأشخاص اللي يناسبهم الروكتان ؟ 

هما اللي يكون عندهم إفرازت دهنيه كثيره وقويه تسبب حبوب بشكل مستمر ومسامات ..  

يعني لاتجي وحده تطلع لها حبه في الشهر او حبتين وتروح تقول ابي أعالج روكتان .. 

فيه ادويه كويسه وتقدري حتى تصرفيها لنفسك من الصيدلي وتعالجي فيها الحبوب الخفيفه والاثار .. 

وهذا موضوع لبعض الادويه لعلاج الحبوب والاثار .. 

طيب هل ينفع أسوي تقشير لبشرتي والاثار اللي فيها وانا لسا بشرتي تفرز دهون قويه وتسبب ظهور حبوب وبثور ؟ 

من خلاصه تجربتي ومسيرة العيله في البشرات الدهنيه والاثار ومرورنا على عيادات كثيره رخيصه او غاليه راح اقولكم انه مو غلط تعالجي الاثار لكن انتي كذا ابدا ماراح تستفيدي شي لان الدهون والحبوب مستمره في الظهور انتي محتاجه في البدايه علاج داخلي بعدين علاج خارجي .. 

قصه للعبره :. 

اختي تقريبا هيا اكثر وحده فينا استمرت بشرتها في إفراز دهون بشكل كثيف وتطلع لها حبوب كثيره حتى بعد عمر ٢٣ سنه راحت لعيادات مشهوره هنا في جده وغاليه سوت ٤ جلسات تقشير ١ منهم كيمائي والثلاث جلسات الباقيه فراكشنل من غير الادويه اللي صرفتها لها الدكتوره والمقشرات تقريبا خسرت مبلغ بقيمة اكثر من ١٠ آلاف :( شي يقهر والله ماانكر بشرتها صفت تماما وصارت نظيفه ولونها اتغير مره لكن بعد انتهاء جلسات التقشير واختفاء اثار الحبوب تماما بدأت ترجع تطلع لها الحبوب وتبقع وتسوي اثار .. اقترحنا تغير الدكتوره وراحت لدكتور ثاني قال لها كل اللي سويتيه بدون اي فائده العلاج هذا المفروض يكون بعد ماتعالجي الدهون اللي ف داخل جسمك عمل لها تحاليل وقرر يصرف لها روكتان قال انتي تحتاجي تجففي الدهون اللي يفرزها جسمك لكن برضو ذَا العلاج له سلبيات كثيره ومتعب لكنه مضمون تماما ورخيص.. 

ايجابيات علاج الروكتان :. 

- اول ايجابيه الدهون راح تختفي تماما والحبوب والرؤؤس السوداء والمسامات .. 

- بشرتك حتكون أنعم واصغر يعني يستاهل التعب .. 

- رخيص جدا ونتائجه فعاله جدا .. 

سلبيات الروكتان وآثاره الجانيه :. 

- فيه مثل يقول من بغى الدح ماقال اح ههههههه وكل علاج له سلبيات لين توصلين للنتائج اللي تبغينها .. 

- وأول شي يقهر في الروكتان الجفاف المصاحب لبشرتك وجسمك وكل شي حتى شفايفك تتشقق وجفونك تكون جافه جدا .. ( يعني تمشين ومرطباتك معاكِ) 

- يتعب الجسم يسبب خمول والآم  في البطن تقلبات في المزاج .. 

- اختي وبنت خالي لاحظو انه الدوره اتلخبط وقتها وصارت تتأخر وصارت تسبب لهم الم .. 

- ضروري الدكتور يعمل لك تحاليل قبل يصرف لك علاج الروكتان ،، ويتأكد انه كل شي عندك كويس .. 

-  الحامل والمرضع مايفكرو ياخذونه يسبب مشاكل وتشوهات للأجنة .. 

- وطبعا فيه اشتراطات كثيره واشياء يمنعها عنك الدكتور وقت استخدام الروكتان مثل إزاله شمع للوجه والعدسات ممنوعة خاصه لو جرعة الروكتان عاليه ..

- 

اثناء فترة علاجك بالروكتان بشرتك راح تكون من اسواء المرات اللي راح تشوفينها فيها .. 

في البدايه حتطلع لك حبوب ،، بعدها بفتره بسيطه راح يصيبك جفاف وبشرتك وشفايفك تكون مقشره وفيها ع قولت بنت خالي زي التشققات اللي ف الارض الجافه هههههههه .. 

واسواء شي الرؤؤس السوداء راح تكون جدا ظاهره وبارزه بدرجه مستفزه .. 

انتبهي تغيري كثير في روتين عنايتك في بشرتك الا باستشارة طبيبك لانه بشرتك وقتها حتكون من الخارج جافه لكن من الداخل مازالت دهنيه .. 

منتجات العنايه اللي راح يصرفها لك الدكتور راح تكون مناسبه للبشره الدهنيه بس ماتكون قويه وتجفف زياده 

هذا غسول مناسب للبشرات الحساسه خالي من الصابون ، يساعد على ترطيب البشره .. من شركة bio clin 

سعره في حدود ١٠٠ ريال واظن اكثر 

برضو كريمات الترطيب اللي راح يصرفها لك الدكتور حتكون للبشرات الدهنيه .. 

مرطب من بيوديرما مخصص للبشرات الدهنيه تمتصه البشره بسرعه سعره ٩٤ ريال 

وانتي راح تلاحظي انها ماترطب بشرتك كويس لانه البشره من الخارج قمه في الجفاف بس برضو حاولي تصبري وتتحملي .. 

طيب نجي عند نقطه كثير مهمه لما تجي تحطين مكياج وقت الروكتان راح تتعبي كثير مره الأسباب اللي راح تخليك تكرهين نفسك بالميكب هيا :. 

- الاساس راح يتشقق وماراح يطول بسبب الجفاف 

- راح تظهر لك قشور البشره وتكون جدا واضحه مع الاساس 

- برضو الرؤؤس السوداء راح تبان واضحه مع الميكب .. 

- راح تبعدي عن الباودر وكثرته لانه ماراح يناسبك اثناء جفاف بشرتك .. 

بعض طرق العنايه بالبشرة قبل الميكب :. 

- غسلي بشرتك بغسول المناسب لك.. 

- اعملي سكراب خفيف لبشرتك عشان تروح القشور .. ( سكر ناعم + زيت لوز حلو لانه خفيف ع البشره الدهنيه ) 

- نظفي الرؤؤس السوداء اضغطي بيدك راح تطلع ع طول ع فكره .. وممكن لصقات الرؤؤس السوداء .. 

اللصقات من ذَا فيس شوب ب ٢٧ ريال كتبت عنها تدوينه ورائي فيها .. 

- شطفي بعدها وجهك بمويه بارده وحطي ثلجه ملفوفه بشاش على انفك لانه وقتها راح تكون مساماتك جدا مفتوحه .. 

- حطي ماسك مخصص للترطيب واللي تكون جاهزه .. برضو هذي ماسكات من فيس شوب ب ١٠ ريال  

- ارجعي بعدها رطبي بشرتك بالمرطب اللي صرفه دكتورك نفس بيوديرما خفيف وتمتصه البشره  .. 

الميكب المناسب :.

- قبل تبداي الميكب طبقي طرق العنايه السابقه 

- وبعدها ابداي بالبرايمر شخصيا لمن سويت لأختي ميكب في البدايه خليتها تحط كريم ترطيب قوي زياده على كريم  بيوديرما هذا بس تستخدمه قبل تحط مكياج لان ترطيبه مره قوي .. اول واحد يسار 

اسمه :.  

- بعدها حطيت لها برايمر ميكب فورايفر يرطب كويس 

- وحطيت لها شويا من جل  الحلاقه من نيفيا عشان يثبت المكياج اطول وقت ممكن

  بعدها بدأت ف الحواجب عشان البشره تمتص كل كريمات الترطيب  .. 

- اهم نقطه كريم الاساس يكون خفيف ومناسب للبشرات الجافه مثل دولتشي اند غابانا فضيع مره استخدمته ع اختي أعطي نتيجه تجنن عليها وثبت مره تماما .. برضو بنفت كويس خفيف ومايجفف البشره ، جورجيو أرماني مره يجنن كمان .. 

- ابتعدي عن الباودر القوي واللي يجفف البشره زياده وخليك حذره جدا في استخدام الباودر 

( انا أحط في فرشه دمج صغيره باودر منثور وانفض الزايد وأبدا أحط ع الأماكن اللي تحتاج مثل تحت العين أطراف الأنف وسط الجبهه حوالين الفم .. 

- افضل تستخدمين بلاشر كريمي وكنتور كريمي خفيف وأفضل شي استخدمته باليته ميكب فور ايفر  خفيفه مره وسهله في الدمج ،، مو جافه ابدا .. 

- واهم طريقه طبطي بالاسفنجه كل شويا .. وخلي اغلب شغلك بالاسفنجه اسهل لك في التعامل مع البشرات اللي تتقشر وجافه .. 

- بالنسبة ليا اهم نقطه أحط ميست اند فكس من ميكب فور ايفر تعطي نداوه وترطيب وفيه نسبة تثبيت للميكب ،، مااستغنى عنه ابدا اهم نقطه انه البشره بينت انه ديوي وانه فيها نظاره اللمعه اللي حطيتها كانت بنفت بس حطيت شي مره نقطه  .. 

يعني اهم نقطه عشان يضبط المكياج عنايتك قبل وضعه وهذي النقاط السابقه تناسب البشرات الجافه .. 

وبكذا نكون خلصنا تدوينتنا وأشوفكم على الف خير ..