ماسكات ذَا فيس شوب الجاهزة | mask the face shop

مساءكم اجازه سعيده .. ✌🏼️

كثير مننا تكون الاجازه بالنسبة لهم مناسبات وعزائم واجتماعات واسواء شي البشره تبدأ تستهبل في هذي الفتره 😂 

شخصيا قبل اي مناسبه أحب استخدم الماسكات الجاهزة لانها في الغالب تعتمد على تنظيف سطحي للبشره وتنفيه من الدهون او الترطيب ..

لانه لما تستخدمين أي خلطه او اي منتج جديد لازم البشره تسوي رده فعل انها تطلع حبوب..

عشان كذا اتجنبوا  قبل اي مناسبه أنكم تغيرو من طريقة عنايتكم ..

من الماسكات الحلوه المناسبه في السعر ماسكات ذَا فيس شوب .. 

سعرها :. ١٠ ريال .. 

وشخصيا اعتمد قبل اي مناسبه على تنظيف الرؤؤس السوداء

باستخدام لصقات الأنف او الجيلاتين 

لصقات ذَا فيس شوب جيده وتؤدي الغرض الحلو فيها انها رخيصه 

طريقة استخدامها :. 

حطي قطنه فيها مويه تميل للحراره وحطيها على انفك دقائق 

بعدها حطي اللصقه والأنف مبلول عشان تتلصق 

خليها ١٠ دقائق وبعدها انزعيها وشوفي العجب العجاب .. 

اللي ماعجبني فيها شكلها احسها ماتغطي منطقة الأنف كامله ..

الاحظ انه يبقى شويه رؤؤس سوداء ماطلعت لكن اول مااضغط عليها تطلع بسهوله ..

نجي عند الماسكات :. 

- مقدر احكم عليها لأَنِّي استخدمتها فقط كم مره ..

- لكن النتيجه واضحه ومؤقتة ..

- اول ماسك كان للرجال استخدمه زوجي وعندهم ماسكات كثيره سواء للرجال او النساء وباختلاف البشرات ..

أسعار الماسكات :. ١٠ او ١٢ ريال 

طريقة استخدامها :. 

- افتحي الكيس راح تلقي قناع ..

- حطيه القناع على وجهك واتركيه ١٥ دقيقه ..

مميزات القناع :. 

- خال من المواد الصناعية ..

- عضوي ..

- القناع مصنوع من قطن ..

- لايحتوي على مواد تبيض..

- خال من ( الكحول ، البارابين) 

- القناع صديق للبئيه ..

- غير مجرب على الحيوانات .. 

طريقة استخدامه :. 

- بعد غسل الوجهه بالغسول المناسب ..

- حطي التونك ..

- بعدها القناع ..

القناع الاول ( الاسود ) 

بالحبه السوداء لمكافحه علامات الشيخوخة ..

ريحته حلوه تذكرني بعطور الرجال الخفيفه ..

اول مانزلته من وجهه زوجي لاحظت انه فيه نقط على القناع حسيته كأنه نظف الأشياء السطحيه على البشره ..

وحسب ملاحظة زوجي قال يحس انه بشرته مشدوده 

ومثل ماقلت لكم في الغالب الماسكات اللي كذا تكون تدليع للبشره وفي الغالب تكون نتائجها مؤقته فوريه ..

الماسك الثاني :.  

ماسك التوت لاستعاده ليونه البشره وترطيبها.. 

نفس طريقة استخدام الماسك الاول تنظفين بشرتك وبعدين تحطينه ..

اتركيه ١٠ دقائق او اكثر 

بعدين انزعيه راح تلاحظي انه وجهك لسا باقي فيه اثار الماده اللي ف القناع اتركيها لمن تتشربها البشره تماما وبعد ساعه ممكن اغسلي وجهك بمويه بارده .. 

ملاحظاتي للماسك :. 

- في البدايه اول ماتحطي الماسك راح تحسي  شعور بارد ع الوجه..

- القناع ناعم نعومه مو طبيعيه .. 

- القناع راح تلاحظي انه مليان من المنتج ..

- بعد مانشف المنتج على وجهي حسيت شعور لزوجه في الوجهه لكن بعد ماشطفت وجهي بالمويه بشكل خفيف حسّيت بالفعل ترطيب خفيف وإحساس انه البشره توك مغرقتها كريم..

ملاحظه :. 

- بشكل عام كل الماسكات نتائجها مؤقته انا أحب استخدمها قبل اي مناسبه عشان تحل المشكله اللي في بشرتي ..

- لمن تكون بشرتي دهنيه استخدم ماسكات للبشره الدهنيه عشان تجفف لي الدهون .. 

- ضروري يكون دائما عندك ماسكات جاهزه لانها تفك ازمه وتريحك اذا مافيك حيل تسوي خلطات وزحمه 

- احسها من الأشياء اللي حلو تدلعين بشرتك فيها ..

- جربت من الماسكات الجاهزة فيس شوب وبيزلين تتفوق فيس شوب بالريحه الحلوه وكمان شكل المنتج الخارجي 

- لكن بيزلين الحلو فيها انك تقدري تستخدمي الماسك اكثر من مره لانه مايكون المنتج على قناع نفس فيس شوب .. 

واشوفكم على الف خير ..