كريم العين من نيفيا| Q10 plus from Nivea

صباحكم / مساءكم سعاده ورضى .. 

تدوينه اليوم تدوينه مهمه جدا علمتني انه مااحكم على اي منتج بسرعه ضروري نعطي كل منتج حقه.. 

شخصيا أعاني من هالات سوداء تحت العين وتضايقني لانها واضحه اضطر انه دائما اغطيها ، والمشكله انه الهالات توضح للناس انك مرهقه وتعبانه حتى لو ماكنتي تعانين من تعب او إرهاق .. 

ضروري بنات تعرفون سبب الهالات عشان تقدرون تعالجونها انا من يوم تزيد وتصير واضحه اعرف انه الدم عندي منخفض .. 

وبرضو من أسباب وجود الهالات عندي قلة النوم خصوصا في الوقت الحالي وبرضو العامل الوراثي له دور 

يعني الله يخليكم عالجو السبب الداخلي وبعدها عالجو من الخارج عشان تلاحظي نتيجه فعاله .. 

طبعا الكريمات والادوية تحسن من منظر الهالات وتخفف منها لكن اذا كان عندك مشكله داخليه ضروري تعالجونها عشان تكون النتيجه واضحه وحلوه .. 

منتج اليوم كريم عنايه مخصص للعين وسعره رخيص جدا مع انه مااعرف سبب غلا أسعار كريمات العين والمشكله كمية المنتج تكون قليله .. 

منتج اليوم من نيفيا اسمه :. 

Q10 plus

سعره :.

 ١٠ ريال فقط  

أماكن التوفر :. 

الصيدليات والسوبر ماركت

ذكر عن المنتج:. 

- يقلل الهالات السوداء  تحت العين ..

- يقلل التجاعيد ..

- يناسب مستخدمي العدسات اللاصقة ..

طريقة استخدامه :. 

في البدايه كنت أحطه مرتين في اليوم لكن حاليا مره في اليوم 

والمره الثانيه استخدم كريم اخر .. 

عشان الكريم يعطي مفعول حطي نقطه صغنونه على إصبعك وطبطي فيها تحت العين باصبعك طبطبي مو مسح .. 

لو كثرتي شوي بيحوسك وبيبقى كريم ابيض تحت العين..

النتيجه اللي لاحظتها :. 

- في البدايه استخدمته أسبوعين وكنت اكثر شوي وألاحظ انه يتجمع تحت العين ويبقى كريم ويحتاج مسح مو طبطبه 

- بعدها قللت الكميه وصار مده على منطقة تحت العين اسهل وأسرع .. 

- مالاحظت اي نتيجه لو بسيطه خلال الاسبوعين قمت تركته .. 

- وشفت تقرير عنه انه نتائجه تأخذ وقت لين تطلع واتحمست ،، 

- ورجعت له واستمريت شهر كامل بديت الاحظ انه الهالات بالفعل خفت اتحسن شكلها بشكل ملحوظ الحمدلله .. 

- بعد شهرين استمرار مازلت الاحظ انه هالاتي خفت كثير الحمدلله .. 

- لكن لاحظت انه المنطقه مو مرطبه جافه وفيها خطوط صغيره مِن الجفاف .. وقتها عرفت انه مايرطب تحت عيني بشكل كافي .. 

- دخلت معاه كريم من يوسيرين للترطيب صرت في الصباح استخدم نيفيا وفي الليل استخدم كريم من يوسيرين.. 

- الله على النتيجه الفعاله اللي لاحظتها والله سحر جمييل .. 

تقيمي للمنتج :. 

- المنتج مقارنه بسعره شي مررره جميل وبالفعل سحر عمرها الهالات عندي ماخفت بذي الطريقه والله لو اضبط وضع نومي احس بتختفي تماما .. لكن أعيب عليه قلة ترطيبه لكن أبدا مو مشكله تقدري تاخذي كريم ثاني يكون فيه نسبة ترطيب اعلى .. وبرضو النتيجه عشان تبان أخذت وقت طويل ..

_     المنتج يجلس معاك فتره مرره طويله تقريبا من ٣ شهور وهو عندي ولسا ماخلص،، واذا خلص راح اشتري منه  .. 

- حبيباتي ماعاد لكم عذر كريم جدا رخيص ومتوفر في كل مكان لاتتردو وخذوه ماراح تندمو بس اهم شي الاستمرار وعدم الاستعجال .. 

ودمتم بسعادة وكل خير / احبكم :)