الهايلايت طرق توزيعه والمنتجات المناسبه له ، ريفيو العجله الثلاثيه منكريولان | ultra faundation

صباحكم / مساءكم   نور وسرور .. 

الى اي مرحله وصلتو في هوس المكياج  !؟ تعديتو الوضع الطبيعي ولا لسا ههههههههه

المهم من خلال ملاحظتي الشخصيه خصوصا للاشخاص اللي حولي ،، صار فيه وعي كثيير من ناحية المكياج والذوق العام ،، صار فيه تشابهه الاغلب صار يبتعد عن الميكب الاوفر والرسمات الغريبه .. ومع كل هذا ماازال فيه ناس لو مادبقتي وجهها بالميكب ماترتاح ، وتحس انها مااتمكيجت .. 

وشخصيا تدرون وش ينرفزني على قد التعلم وان الاغلبيه صارو يتجهون للميكب الناعم الى انه طلع هوس جديد !؟ 

اللي هو الكنتور والهايلايت :( وماادراكم عن الكنتور والهايلايت كثييير مننا يعتقد انه الهايلايت والكنتور راح تعمل معاهم معجزه خطيره وتطمح لشي غريب عجيب تقولي اخفي لي الذقن اللي نازل هههههه انا ممكن اخفف من وضعه وممكن عن طريق الهايلايت وتنوير بعض المناطق نخفف من حدتة خصوصا لو ظللناه بالغامق لانه نظرك ونظر البقيه يتجهه للون الفاتح ، لكن اخفيه وكان الجلد اللي تحت الذقن مو فيه اعذريني هذا مكياج موب عمليه جراحيه :| 

المهم مالكم بالطويله ، ورغم هذا ماننكر انه الكنتور والهايلايت يعملو فرق وفرق حلو خصوصا لو كان باعتدال وبطريقه صحيحه .. 

لكن سالفة انك تخبصين وجهك وانفك ولا تدمجينها زين اعذريني وقتها بتطلعين مهرج .. 

موقف ماانساه ابدا : 

قبل فتره كنت في صالون نسائي وقابلت انسانه معرفتي فيها بسيطه ،، المهم بعد السلام وكذا اختفت رجعت قابلتها بعدين وكانت قد عملت ميكب ، البنت واضح مبسوطه في الميكب اول شي لفتني لون برتقالي حوالين الانف وابيض في الوسط تصدقون بالله ماقدرت اشيل عيني عن خشمها انهبلت منه :( اللي زعلني انه سألت كيف شكلي واظطريت اجاملها قلت لها مرتب ماقدرت اجامل اكثر صراحه مع انه كان مكياج العين مرتب موب بشع ، بس ولا شي صدمني قد كنتور وهايلايت الانف :/ 

يعني قبل تقرون التدوينه حطو في بالكم ذوقي يختلف الف مره عن ذوقك وعن ذوق ناس كثير وممكن نتفق في امور معينه ، لكن خذي اللي يفيدك ويناسبك واتركي اللي مايفيدك .. 

تدوينه اليوم حتكلم فيها فقط عن الهايلايت وانواعه وطرق توزيعه ومنتجات متعدده تستخدم للهايلايت .

التدوينه اللي بعدها حتكون عن الكنتور.. 

ايش هو الهايلايت ؟ 

هو لون افتح منك بدرجه بدرجتين اللي تفضلينه اهم شي مو بعيد عن لونك الاساسي وعن لون كريم اساسك .. 

ايش فائدة الهايلايت ؟ 

عشان تنورين وتبرزين الاماكن اللي انتي حابه انها تكون واضحه وبارزه .. 

ايش المنتجات اللي تستخدم في الهايلايت؟ 

اي منتج يؤدي الغرض ممكن كونسيلر سائل ، او كونسيلر كريمي ، او ممكن تستخدمين بودره ، وممكن كريم اساس . 

نصائح عامه : 

- اي منتج كريمي ويكون ثقيل لاتقربينه تحت العين اتركي مسافه بينه وبين العين . 

- لما تستخدمين منتج كريمي ضروري تثبيته ببودره سواء بودره مضغوطه عاديه او بودره منثوره ( سائبه ) 

- استخدمي في توزيع المنتج فرشه وبعدين ابداي بدمجه بالبيوتي بلندر او بفرشه دمج . 

- في المنتج الكريمي لك حرية الاختيار بعضهم يحبون يوزعونه قبل كريم الاساس وبعضهم بعد توزيع كريم الاساس .. 

- كل وحده وحسب تشكيل وجهها وحسب هيا ايش تفضل تبرز في وجهها الاغلبيه يعتقدو انه فقط تحت العين بس ننور المنطقه ، لا ممكن الحنك ممكن الجبهه كامله يعني احسها مسأله ذوقيه 

في ناس تحب انها تقصر او تقلل من عرض الذقن وماتحب تبرزه بلون فاتح ، وفي بعضهم لا يحبون انه الذقن يكون عريض وبارز ( كله من ذا الموضه صارت هوس لنا هههههههه ) 

صور توضيحيه للهايلايت : 

اللون الاصفر او هو الهايلايت شايفين الخطوط البيضاء هيا الهايلايت المقصود 

كل شي صارو يحطون له كنتور وهايلايت هههههههه يقولون طلع كنتور للبطن كمان :) 

الصور كلها من قوقل حطيتها للتوضيح فقط 

ايش المنتجات اللي ممكن نستخدمها للهايلايت ؟ 

مافيه منتج معين اقدر اقولك هو المناسب ، الاختيارات كثيره وكل شركة مكياج صارت تبدع في باليتات الهايلايت والكنتور ، وصراحة هو يرجع للذوق الشخصي وميزانيتك .. 

حتكلم عن هذي المنتجات بشكل مبسط وكلها تنفع للهايلايت : 

١- الكونسيلر : 

من قبل تطلع باليتات خاصه بالكنتور والهايلايت كنا نعتمد على الكونسيلر في ابراز وتفتيح لون المنطقه ، باختلاف انواع الكونسيلر بعضها تعطي تغطيه ولون واضح مثل كونسيلر ماك برولونق وير:  اعتقد الكل هاب فيه واظنه متوفر عند الاغلبيه ، وظيفته هذا الكونسيلر تغطيه العيوب والهالات وجدا تغطيته وثباته عالي انصحك لما تستخدمي كونسيلر للتغطيه تاخذي لون نفس درجتك بالضبط في حال وجود هالات حطي مصحح برتقالي اللون ووزعي الكونسيلر واعتمدي على البودره في ابراز واظهار المنطقه انصح شخصيا في استخدام البودره السائبه او المنثوره مثل : 

بودرة البنانا : 

او بودرة لورا مارسيه الشفافه : 

تثبت لك الكونسيلر تنور المنطقه بشكل مرتب وحلو 

الكونسيلر الثاني اللي استخدمه في تنوير المنطقه هو كونسيلر نارس : تغطيته جيده وحلوه وثباته في حدود ٦ ساعات وممكن اكثر لو ثبتيه بطريقه جيده عند استخدامي لكونسيلر نارس احاول قدر الإمكان اني احطه بعيد عن اسفل عيني لانه مشكلته يدخل في الخطوط التعبيريه اذا ماثبتيه بسرعه . صرت استخدمه على عظمة الانف وسط الجبهه اسفل الحنك .. 

فيه انواع من الكونسيلر نهائيا مالها تغطيه فقط تعطيك تنوير ونظافه للمنطقه اللي هيا : 

ماك ، ديور ، دولتشي اند غابانا .. 

جمعيها مالها تغطيه ابدا.. 

استخدامي لها : 

عن طريق برم العلبه من اسفل يطلع لك المنتج من فوق وابدي وزعيه بالفرشه الموجوده في نفس الكونسيلر .. 

الفرق بينهم : 

في الالوان والسواتش موضح لكم الفرق .. 

دولتشي اند قابانا : صعب توزيعه يجف بسرعه عشان كذا حطي تحت عين وحده ووزعيه على طول باصبعك او بفرشه وانا افضل الاصبع لانه يعطي توزيع حلو وبرضو فيه حراره فيساعد في توزيعه بشكل افضل ، يثبت على طول واحس معاه مااحتاج باودر مع انه انا افضل تثبتيه بعدين ببودره بشكل خفيف ، تحسينه يشد لك المنطقه مااعرف اذا كان يناسب البشرات الجافه جدا او لا اهم شي رطبي تحت عينك وباستمرار .. ثباته كويس وتحسينه يوحي بنظافه طبعا انا استخدمه بعد مااغطي المنطقه بكونسيلر خاص للتغطيه مثل كونسيلر ماك او نارس او استي لودر او اي كونسيلر ، لاحظت انه بعد فتره ٦ ساعات يحسسك انه بيتقشر او يتشقق ، مايحتاج انكم تشتروه في بدائل ارخص وافضل بكثير ، سعره ناسيه بالتحديد بس اعتقد اكثر من ١٥٠ 

ديور : خفيف ولطيف مايجف بسرعه سهل توزيعه لكن برضو مو تتركينه فتره بعدين تقولين مااتوزع وجف واتكتل .. برضو استخدمه بعد مااغطي الهالات بكونسيلر خاص للتغطيه وبعدها وقبل انتهي من الميكب احطه ينور لك المنطقه بشكل حلو وبدون مبالغه ،  اثبته ببودر سائبه ، الدرجه اللي عندي رقمها ٢ وفيه اعتقد درجتين ثانيه ، يعتبر غالي جدا على الكميه المتوفره فيه ناسيه الاسعار نهائيا والله بس قيمته فوق ١٥٠ ، 

ماك : مشكلتي معاه اني اخذت الدرجه الغلط مع انه كنت طالبه اللون اللي جاي ع صفار بس شكلي وانا احطه في سلة المشتريات ضرب مخي، طلبته اون لاين وسعره ارخص من هنا ، طبعا جربته بس عشان اختبر قوامه خفيف اخف من البقيه يندمج بسهوله اهم شي بعد ماتحطينه وزعيه بسرعه عشان مايجف ويتكتل .. 

الفرش اللي استخدمها بشكل عام في المنتجات الكريميه او في توزيع الهايلايت : 

- طريقتي في استخدام الفرش مكتوبه في الشرح اللي حيكون تحت .. 

٢- باليت انستازيا للكنتور والهايلايت : 

اشتريته من متجر حسابهم حاطته لكم في الانستقرام ، بسعر ٢٥٠ ، الماركه مو موجوده في السعوديه بس انا اطلب من موقعهم او شوفي تاجره توفر لك اللي انتي حابته . 

ماراح اكتب عن المنتج حاليا شي لانه حكتب عنه تدوينه خاصه :) 

فقط انا استخدم اللون الاصفر البنانا في تنوير الاماكن اللي انا حابتها ، 

الدرجه اللي عندي من المنتج هيا ميديوم ، 

طريقة استخدامي اللون الاصفر : 

١- اغطي الهالات باستخدام كونسيلر .. 

٢- اوزع اللون الاصفر بفرشه مورفي تحت العين وعلى عظمة الانف وسط الجبهه فوق الشفه العليا والاماكن اللي انا حابه اني ابرزها.. 

٣-   ادمج باسفنجة البيوتي بلندر او بفرشة ماك رقمها ١٨٧ 

واثبت شغلي كله ببودرة البنانا المنثوره او باليت الكنتور تبعهم الباودر .. 

ريفيو لمنتج كريولان العجله الثلاثيه |kryolan

شركة كريولاين حسب ماقريت عنها اول شركة تجميل سينمائي ، اسست في برلين عام ١٩٤٥ 

اخترع هذا المكياج بعد اول فيلم سينمائي في المانيا ، وتم تطوير منتجات كريولان عشان تناسب التصوير السينمائي وتظهر بشرات الممثلات في افضل واحسن صوره ، 

منتجنا اليوم اسمه : الترا فاونديشن |  

Ultra fiundation

درجة اللون : A ( متوفر ٤ درجات الاختلاف فقط في اللون البيج) 

ذكر عن المنتج : 

- يمتاز هذا النوع من كريم الأساس بأنه مركب و مخصص لجميع متطلبات الماكياج وتوقعاته . 

-  يعمل كمصحح لعيوب الماكياج و خاص جدا لأعمال التصوير لأنه يعطي إطلالة مشرقة خالية من الشوائب ..

- يمتاز بأنه مركز و متطور بجميع مكوناته و دقيق على البشرة ولا يحتوي على زيوت معدنية كي يدعم البشرة و يساعدها على امتصاص الماكياج بسرعة.. 

مميزات المنتج : 

- العجله تحتوي ثلاث الوان اللون البيج يستخدم كفاونديشن او فقط لتغطية الاثار ، اللون الاصفر هايلايت او تنظيف الحاجب من تحت ، اللون البني للكنتور ونحت الوجهه .. 

- تغطيته جدا عااليه.. 

- كميته كويسه وكبيره مقارنه بسعره .. 

- شي بسيط منه يكفي .. 

عيوبه : 

- لان تغطيته عاليه فهو ثقيل ولازم لما تستخدمينه ع بشرتك تنظفينها منه بشكل كويس .. 

- يسد المسام ويزيد البشره سوء مع كثرة استخدامه .. 

- يناسب فقط البشرات الجاافه جدا ، البشرات الدهنيه راح يحوس لهم الدنيا .. 

- يحتوي على زيوت كثيره لما تحطينه في منطقه عاديه تلاحظين تتكون عن المنتج من فوق طبقه دهنيه على شكل نقاط مويه .. 

مشاعري تجاهه المنتج : 

- لما كنت اعاني من حبوب في بشرتي ومسامات كنت فقط عند المناسبات المهمه احط منه ع المناطق المتضرره بشكل طبطبه بعدين احط الفاونديشن وادمجه ، يحسسني انه بشرتي مصقوله صقل . 

لكنه يتعب البشره مع استخدامه الدائم .. 

- حبيته فقط لما انظف فيه تحت الحواجب .. 

- الاحظ كثير ميكب ارتست مايستغنون عنه مااعرف ليش مع انه مايناسب الكل فقط البشرات الجافه .. 

- اللون الاصفر الكل يستخدمه للهايلات والتنوير مع انه اذا كثرتي منه بيصير الشكل ملطخ ولونه قوي جدا، عشان كذا افضل تدمجونه بالبيوتي بلندر لانها تخفف من حدته وتدمجه بسهوله .. 

هل يستخدم لتغطيته الهالات ؟ 

المنتج كريمي وثقيل جدا حرااام تحطونه تحت عينكم لانه بعد وقت بسيط راح يخطط ويدخل في الخطوط الصغيره ، ومنطقة تحت العين حساسه وجلدها رقيق لاتتعبونها بمنتجات ثقيله وصعبه في الازاله ،  طبعا لازم تثبته ببودره منثوره مثل لورا مارسيه او بنانا او اي باودر تحبينها .. 

هل يستحق الشراء ؟ 

حبيته فقط للتنظيف تحت الحاجب يخفي الشعرات الخفيفه الزايده لاتجي وحده تبغى تغطي نص حاجبها وتقول لي مايخفي اكيد ماراح يخفي مو سحر هو :) 

سعره : ب ١٨٠ او اقل 

متوفر في محلات روج او من التاجرات ..