اختياري لموقع المصمم .self-portrait وتجربتي مع الموقع

صباح / مساء الكياته .. 

تدوينة اليوم بعيده كل البعد عن الميكب والعنايه بس شخصيا اعتبرها مكمله ومهمه .. 

اغلبنا احنا البنات اهتمامنا يركز ع اللبس والفاشن وننسى الميكب والشعر .. 

شخصيا اركز ع اللبس والميكب وانسى الشعر دائما اكرهه تصفيف شعري :( 

دائما اي لوك ضروري يكون متكامل حتى يبان جماله واناقته .. 

اهتمامي ف اللبس يركز على انه مو لازم شي جديد اهتم كثير باني ادور شي مميز وغريب .. 

ولان اسواقنا الحلوه ماتعزز عندك ذا الشي صرت قليل اشتري اللبس وقليل يطري على بالي انه لازم اشتري ملابس السوق عندنا بالفعل ممل ومكرر بشكل مستفز .. 

ولو جينا للاقمشه والخياطين ماتخلو من انها الاقمشه مكرره ومستفزه وبرضو اسعارها عاليه والخياطين حدث ولا حرج ياانهم سيئين مره او كويسين عاديين شخصيا الى الان ماشفت خياطه او خياط اقدر اقول انه لقيت ضالتي عنده :( ياخياطه غير متقنه او سعر مبالغ فيه .. 

المهم مالكم بالطويله عندي اختي توافقني في الراي والحلو كمان انها متابعه جيده للممثلات العالميات والمصممين كمان .. هذا الشي يساعدنا انه نلقى ممصمين عالمين باسعار حلوه وتناسبنا .. 

ومن المواقع اللي اشتريت منها موخرا كان للمصمم : 

            (Self portrait) 

 موقعه الرسمي  : http://www.self-portrait-studio.co

حسابه في الانستقرام  : 

اضغطي هنا

طبعا اختي رسلت لي الموقع اتفرج فيه وعجبني كذا قطعه وقررت اشتري منه لزواج خالتي الله يسعدها .. 

التدوينه راح تهم البنات اللي تبغى شي مميز وناعم وبسعر معقول طرحت تجربتي للموقع للفائده والاستفاده .. 

اختياري للفستان كان قبل اشوف صور للمشاهير جديا صور الموقع سيئه لكن فيه صور ثانيه توضح كثير القطعه بس انا شخصيا اخترت ع صور الموقع 

الفستان الثاني لاختي حطيته لكم عشان تشوفو الخامه كيف تختلف 

معلومات عن الموقع وطريقة الشراء : 

الموقع يتعامل بعملة الجنيه الاسترليني .. 

لما تشترين قطعتين او اكثر يشحنها مجانا لك على موقع الشوب اند شيب.. 

من موقع الشوب شحنتها على ارامكس.. 

الشحنه اخذت تقريبا ٤ او ٥ ايام لين وصلتني .. 

حاولت ادفع بفيزا انماء لكن ماقبلها الموقع لكن يقبل  فيزا الراجحي او ماسترد كارد الراجحي ومااعرف عن اي بنك ثاني .. 

اسعار الفساتين في الموقع تتراوح بين ١٥٠٠ الى ٢٠٠٠ ريال وفيه اشياء اعتقد اسعارها ارخص  

المصمم له معرض في لندن فقط هذا اللي اعرفه .. 

كان يستاهل التجربه وحسيته خيار موفق الحمدلله ماندمت ابدا اني اشتريت منه .. 

في الموقع فيه جدول للخيارات يساعدكم ع اختيار المقاس المناسب شخصيا انا اخذت مقاس ٨ اللي هو يكون في مقاساتي الثانيه سمول ،، الحمدلله كنت ناريه اخذ مقاس ٦ ههههههه .. 

اسئلة تهمكم : 

هل فيه امكانيه استرجاع الفستان ؟ 

طالما كان الفستان لسا في بريدك الامريكي تقدرين وقتها تسترجعين المبلغ او تغيرين المقاس.. 

طالما انشحن ووصلت الشحنه لگ خلاص انسي انك تبدلين او تغيرين .. 

مشاهير لبسو منه : 

ووصفي للفستان : 

راح اتكلم عن القماش فقط بصراحه انصدمت جديا من  خامته جدا قويه وثقيله وفضيعه والفستان نفسه فيه تفاصيل مررا حلوه وتهم اي بنت .. 

فقط اللي ماحبيته انه بطانة القماش قصيره شخصيا ماالبس كذا ابدا بس كون البطانه سوداء ماتعبت ابدا في تعديلها مع انه مالقيت نفس خامة البطانه بس عادي وصلتها بقماش بخامه قريبه منها والحمدلله مابان شي واتعدل وطلع شكله حلو 

طولي ١٥٧ وتقريبا الفستان وصل لين كعب رجلي .. 

لكن الفستان الابيض تبع اختي كانت الخامه ونوعها ولونها صعبه وماقدرت تعدل عليها .. 

طول الفستان تقريبا نصف الساق او اكثر..  

هل تشوفين السعر مبالغ فيه ؟ 

شخصيا ومقارنه بملابس السهره في السوق اشوفه يستاهل قيمته وزياده ..

وكثير منكم راح يختلف معايا في هذه النقطه سواء من الناحيه الذوقيه او غيره ... 

كثير قالو لي مره جميل وملفت وبرضو كثير قالو لي مايناسب سهره ومو حلو ويشوفوه مايستاهل قيمته .. 

دائما لما تلبسي ارضي ذوقك وارضي نفسك قبل كل الناس يعني الناس اذواقهم مختلفه واعمارهم مختلفه عمرك ماراح تلبسي لبس وراح الكل يتفق ع جماله .. 

شخصيا حتى لو اشوف لبس ابدا ماعجبني على اي شخص ماابدي رائي الحقيقي حتى لو طلب مني مو لاني مااقول الصدق بس خلاص الشخص قده لبس اللبس طبيعي مايبغى رائك الحقيقي دائما اقول حلو والغالب قالب هذي ردود حلوه وتبين تربيتك الحلوه اللي تربيتي عليها.. 

شخصيا عشان اكون اكثر مصداقيه مع الشخص اللي طلب رائي في شكله في مناسبة زواج !! اعطي رائي في اكثر شي عاجبني في الشخص سواء كان شعره او مكياجه او اي شي .. 

طيب اذا شخص طلب رائي في شي قبل مايشتريه ؟؟ 

اسال واقول اذا عاجبك مره اتوكل ع الله واشتريه لان الذوق مختلف لكن لو الشخص محتار وحاس انه يحتاج استشاره هنا اعطي انا رائي الصريح تماما  .. 

ونصيحه مهمه : 

- دائما كل لبس يختلف في كل مره تنسقي عليه اكسسوار او شوز او مع طريقة الشعر .. 

- مافيها اي مشكله اذا في يوم اخفقتي في ذوق او لبس معين هذا حيكون درس في المستقبل يعلمك ويفيدك .. 

- عمرك ماتحكمي على شخص من خلال لبسه اذا كان ماركه او غيره دائما الاخلاق تبقى والكل مصيره راح ينسى ايش لبستي او كيف كان شكلك .. 

- لاحظت في الفتره الاخيره مراهقاتنا يحسبو ان التكشير او اني ماابتسم في وجهه الشخص اللي يسلم عليا انه رزه وحركه حلوه لاحبيبتي ذا وان دل يدل على شي مو كويس.. 

لازم نعلم الجيل الصاعد انه مو الماركات او الكشخه هيا اساس الصداقات او على اساسها تكون اخلاقنا .. 

موقف صادفني من الجيل الصاعد : 

اطفال عمرهم ١٢ سنه وحده تقول لبنت خالتها شفتي فلانه مره شوزها ماعجبني قديم وتحسينه اكبر منها وهيا توافقها الرائي طبعا 

شخصيا انصدمت مااعرف ازعل او اعلمهم انه مايصلح كذا او ايش التصرف الصحيح لانه اطفالنا بالتأكيد سمعو مننا هذا الكلام وقلدوه .. 

زعلت جديا من سطحية التفكير وزعلت على طفولتهم اللي راحت عليهم وهما يتكلمو عن شي اكبر منهم ... 

بالفعل فيه كلام كثيير ودي اقوله بس خلاص بترك لكم المايك ابدو رايكم سواء في الفستان او في القرقره اللي طرحتها هههههههه