فوائد زيت جوز الهند | وطريقة استخدامه للبشره والشعر | ريفيو عن زيت جوزالهند من ڤيتاڤيق ..

مساء / صباح الانتكه والجمال .. 

وش اكثر شي تحبون الاهتمام فيه وتحبون تبرزونه في نفسكم ؟؟ 

كثير احس يفضلون ويحبون الاهتمام في الشعر ،، وبالفعل أمس في سناب شتات لمن اتكلمت عن زيت جوز الهند جاتني استفسارات كثيره عنه .. 

قبل كل شي حطو في بالكم اللي ينفع لشخص ممكن ماينفع لك انتي اكثر انسانه تعرفين شعرك وايش يحتاج وايش يناسبه ..

انا اكتب لكم تجربتي واكتب مميزات المنتج وانتي عليك وقتها تقرري اذا يناسبك او لا .. 

بشكل عام الزيوت مثل ماتفيدك كثرتها تضرك وكمان اذا استخدمتي زيت مو مناسبك برضو راح يضرك .. 

طبعا التجربة خير برهان ومالك الا تجربين لين تعرفين اللي يناسبك وايش اللي يضرك ،، 

ونستفتح تدوينتنا بالفوائد العامه لزيت جوز الهند 

نجي لفوائد زيت جوز الهند العضوي :. 

راح اذكر لكم المهم والصحيح .. 

- يمكن استخدام زيت جوز الهند كمزيل لمكياج العيون.

- يقوم بتفتيح البقع عند وضعه وتدليكه على البشرة مباشرة.

- زيت جوز الهند يمنع ظهور علامات تمدد الجلد أثناء الحمل.

- زيت جوز الهند هو مرطب ليلي  للوجه.

- تعانين من الشفاه المتشققة؟ عالجيهم بوضع زيت جوز الهند عليهم باستمرار.

- زيت جوز الهند بلسم رائع للشعر

- يعمل زيت جوز الهند كبديل رائع للزيوت النباتية في أي وصفة طعام.

- يمكن تدليك فروة الشعر بزيت جوز الهند يومياً ويساعد على نمو الشعر أسرع بكثير.

- يعمل زيت جوز الهند بشكل رائع كمبيض أسنان طبيعي.

- يعمل زيت جوز الهند كمرطب مثالي لتجنب علامات السن.

- يساعد زيت جوز الهند على نمو الأظافر بشكل أسرع . 

طبعا مو اي زيت جوز هند تنطبق عليه الفوائد السابقة لازم يكون عضوي وبكر خالص لانه بعض زيوت جوز الهند يكون مضاف لها مواد مضره .. 

كيف تعرفون اذا الزيت كويس او لا :. 

- ريحته تشبهه جوز الهند الطازج..

- لونه ابيض ..

ريفيو عن زيت حوز الهند العضوي من ڤيتاڤيق..

حسابهم انستقرام :.
 هنا

سعره :. 

١٠٠ ريال 

حسابهم في الانستقرام :. 

مميزات جوز الهند من ڤيتاڤيق مثل ما ذكروه  :. 

-ماده عضويه معتمده 

-بكر ممتاز ، عالي الجوده ، خالص ، غير مكرر 

-خالي مِن المواد الكيميائيه .. 

-غير معدل وراثيا، ومعصور عصر بارد عشان الزيت مايفقد فوائده .. ( والنقاط الاربعه السابقة كمان تفيدك تعرفين اذا كان الزيت كويس او لا ) .. 

-يمكن إضافته للطهي ومع الحلويات .. 

-يحتوي على حمض اللوريك وغيرها من الدهون الثلاثيه التي تساعد على الهضم وخسارة الوزن .. 

-مثالي للشعر والبشريه حيث انه يستخدم كمرطب طبيعي ..

-مناسب للتدليك وللتشققات 

استخداماتي للزيت :. 

-استخدمه لشعري مرتين في الأسبوع .. 

-مزيل للميكب .. 

-استخدمه في غسيل بشرتي بالطريقه الكوريه ( كتبتها في مدونه سابقه ) 

-مرطب للشفايف ..

-مرطب للجسم وطريقتي أدهن جسمي قبل مااتروش بساعه او ساعتين وشوفي الترطيب كيف .. 

-مقشر للجسم اخلطه مع شوية نسكافيه او بن وافرك جسمي فيه وكمان استخدم الطريقه هذي لأولادي فعاله مع الاستمرار .. 

-استخدمه زي الماسك لشعري أحطه على أطراف شعري والفها بقطعه بلاستيك مده نصف ساعه واشطف شعري بمويه وشامبو يخفف من منظر الشعر المتقصف .. 

نتائج الزيت اللي لاحظتها :. 

-اول شي لاحظته الترطيب بشرتي صار فيها طرواه جميله ونداوه .. 

-شعري الحمدلله لاحظت انه صار أطول وفيه لمعه حلوه وفيه حيويه .. 

-بشرتي صارت افضل خصوصا شفايفي ومنطقه حول الشفايف .. 

-من ناحيه تفتيح الاثار والبقع لاحظتها في أطفالي  الحمدلله .. 

-شعر بنتي  الحمدلله اتغير وصار اطول طبيعه شعرها كيرلي وفيه نفشه هجد كثير من ناحيه النفشه .. 

-الحمدلله من ناحية قشره الشعر خففها لكن مااختفت مره .. 

-قبل استخدم زيت حوز الهند من فيتافيق كنت استخدم جوز الهند من عطار وطوال فترة حملي أدهن جسمي الحمدلله ماعانيت من اي تشققات .. 

-يعني اذا فيه عطار تثقين من جودة زيت جوز الهند حقهم وانه طبيعي مو مخلوط ومعصور عصر بارد أشتريه .. 

يميز زيت فيتافيق عن غيره :. 

-طبيعي ورئحته افضل من الزيوت اللي تكون جاهزه ومعلبه ..

-علبته انيقه وحلوه وكميته كبيره وكافيه جدا .. 

-استخدمته شهر كامل وماخلص غير الربع .. 

-زيت فيتافيق زيت عضوي وبكر خالص عشان كذا نقدر نستخدمه في الاكل وفي الرجيم ..

كم مره نستخدم الزيت ؟ 

انا اشوف مرتين الى ٣ مرات في الأسبوع كافيه .. 

قد ايش كمية الزيت اللي نستخدمها ؟ 

طبعا يختلف حسب طول شعرك وحسب كثافته لكن فكره انك تغرقين الشعره من فوق لين تحت هذا غلط ،، 

شخصيا انا أحط في أطراف أصابعي شويه زيت وأبدا أفرك الفروه بشكل خفيف وكمان أحط ملعقه صغيره في يدي وأدهن أطراف شعري فيها .. 

قد ايش المده اللي نترك الزيت فيها على الشعر ؟ 

والله انا اشوف ساعتين كافيه لكن فيه بنات تحب تترك الزيت يوم كامل ويفيدها مايضرها انا ممكن انام فيه اذا كنت حاطه زيت كميه مرره قليله ..

وبكذا نكون خلصنا تدوينة اليوم ويارب تفيدكم ونشوفكم على خير ..