PORE TIGHTEN from thefaceshop|منتج كوري للمسامات

صباح / مساء الجمال ... 

اخبار الناس الطعمه :) 

اكثر مشكله تواجهه البنات هيا المسامات الكل عنده مسامات في بشرته 

لكن الفرق في شكلها بعضهم ظاهره وواضحة وبعضهم صغيره ماتبان ،، 

وكله يعتمد على طبيعة البشره وعلى طريقة عنايتك فيها .. 

وأصعب مشكله تواجهه الأطباء هيا المسامات لانها ماتتعالج لكن ممكن يخففون من شكلها .. 

عشان كذا اتجنبي انك تهملي بشرتك بعدها راح تدفعي آلاف عشان تعالجيها .. 

واكيد احنا في غِنى عن دفع هذي الفلوس كلها .. 

بناتنا الحلوات المراهقات من البدايه اصرو على اهاليكم لمصروف مخصص لغسول وتونر وكريم ترطيب لبشرتك مو ضروري مبلغ كبير ١٠٠ ريال او ٢٠٠ ريال تكفيكم 

فيه كثير منتجات اسعارها في متناول اليد ممكن ماتكون نتائجها جباره لكنها تفي بالغرض .. 

نرجع لتدوينتنا منتج اليوم منتج كوري مخصص للمسامات 

اسمه:. 

PORE TIGHTEN

سعره :. اقل من ١٠٠ ريال اذا ماكنت غلطانه او يمكن ١٢٠ريال 

أماكن توفره :. 

ذَا فيس شوب موجود في مجمع العرب مقابل كشك كريسبي كريم .. 

ذكر عن المنتج :. 

-بخلاصه بذور كستناء الحصان  

-قابض للمسامات ويعطي ملمس ناعم للمسامات الواسعه 

مميزات المنتج :. 

-السيروم خفيف مائي مو دهني أبدا ولا يدبق .. 

-حجمه كبير واقتصادي .. 

-رائحته حلوه وشكله كيوت .. 

طريقة استخدام المنتج :. 

-بعد غسل وجهي وتنظيفه أحط السيروم.. 

-اضغط ضغطتين من المنتج وأبدا اطبطب على الأماكن اللي يكون فيها مسامات لما ينشف .. 

-أحب استخدمه قبل الميكب لاحظت انه نفس البرايم ينعم المسامات ويصير سهل وضع كريم الأساس بعده .. 

ملاحظاتي للمنتج :. 

-حبيت المنتج جدا ملاحظتي لطريقه عمله انه ينعم ويقبض المسام بعد تنظيفها يعني اذا عملتي تنظيف بشره او عملتي تقشير لبشرتك حطي منه يقفل لك المسامات وينعمها .. 

-صرت بعد مااستخدمه متطمنه انه مساماتي مقفله ومقبوضه.. 

-حسن من شكلها وصارت أفضل لكن أنا الحمدلله مساماتي صغيره جدا بس الله مشغلني فيها اخاف اهملها او شي وتنعدم .. 

-لكن اللي أساسا مساماتها معدومه مااظن ينفعها كثير تحتاج عنايه خاصه .. 

-حبيته قبل الميكب كمان حسيته يمسك الميكب مايروح ويعمل حمايه للمسام من دخول الميكب .. 

-اذا عندك تهيج في بشرتك او جروح ابتعدتي عن السيروم لانه فيه كحول .. 

ويارب تفيدكم التدوينه وتستفيدوا وأشوفكم على خير،،