الجزء الثاني من دورة السناب شات لأساسيات المكياج | الشدووالايلاينروطرقرسم الحواجب وأفضل الطرق لرسم الشفايف

مساءكم / صباحكم .. مطر وغيم

نكمل الجزء الباقي من اساسيات الميكب ،،  الجزء الاول هنا

بنات كثير يقولو احنا نحفظ كل الكلام اللي يقولوه الارتست ونكتبه

لكن لما يجي وقت نبغى نحط فيه ميكب نسوي اللي اتعودنا عليه !!

انا أقول انه طبيعي انك في وقت انتي حاضره فيه مناسبه ماراح تجازفين

وتسوين شي يدك مااتعودت عليه لكن المعلومات الجديده عليكم

طبقوها في يوم انتو رايقين فيه وتبغون تطبقون

والأفضل تطبقون في نفس اليوم اللي اتعلمتو فيه المعلومات الجديده 🌸 

نبدأ الان في بقية محاور دورتنا :. 

اولا :. الشدو :

قبل نبدأ بوضع الشدو لازم يكون عندك برايمر قبل الشدو 

متوفر في أماكن كثيره بعضهم يحطون بدال البرايمر كونسيلر

لكن البنات اللي جفونهم دهنيه او الشدو يخطط فيها 

أقولكم ضروري تَستخدمون البرايمر .. 

١- فائدة برايمر الشدو :. 

- تثبيت الشدو .. 

- توضيح لون الشدو  .. 

- توحيد لون الجفن .. 

- البرايمر ممكن يكون شفاف او بلون .. 

- افضل توزعين البرايمر بفرشه بعدين طبطي باصبعك عشان يتوزع بشكل كويس .. 

٢- انواع الشدو :. 

- شدو مضغوط وينقسم الى :. 

مطفي ،، شيمر ،، قلتر .. 

- البقمنت ( المنثور ) ينقسم الى :. 

مطفي ،، شيمر ،، قلتر .. 

- الكريمي .. 

ملاحظه :. 

- اسهل وأفضل الشدوات في التوزيع والدمج هيا الشدوات المضغوطه .. 

- الشدوات الكريميه يفضّل مدها بالإصبع 

*نحتاج عشان تكون عندنا رسمه شدو مرتبه ٣ او ٤ فرش :

- فرشه دمج كبيره للجفن المتحرك وتستخدم في الغالب في دمج وتوزيع اللون الانتقالي  .. 

- فرشة دمج اصغر لتحديد لون الشدو اكثر .. 

- فرشه فلات للجفن الثابت .. 

- فرشه دمج صغيره مره اسمها بنسل برش تستخدم بمدمع العين و شدو تحت الحاجب  .. 

طيب كثير يسألون ايش هو اللون الانتقالي ؟ 

هو لون مطفي ، بدون لمعه ، يوضع على الجفن المتحرك 

فائدته :. يعطي تدرج للشدو ونظافه في الدمج .. 

نصائح عامه :. 

- اذا بداتي في مكياج الوجهه قبل الشدو افضل انك تحطي تحت العين بودره منثوره
وكثريها شوي واتركيها لين تخلصي من الشدو وبعدين انفضيها عشان تضمنون انه مكياجكم يبقى نظيف .. 

- العيون اللي جفنها صغير تعتمد على فرش صغيره عشان تتحكم في الشدو اكثر ..

- لاتكثري الشدو في الفرشه من اول مره اعتمدي على التدريج وحطي كميه قليله شدو في الفرشه ودائما انفضي الزائد من الفرشه .. 

- اذا اتكتل الشدو في مكان معين حطي شويه باودر منثور في فرشه الدمج وادمجي مكان الشدو المتكتل ..

اهم نقطه في الشدو هو حركة الفرشه وطريقه الدمج !! 

اسهل طريقه أنكم تخلو الفرشه بشكلعامودي ع الجفن بدون ضغط واعتمدو على حركه دائريه في الدمج

وبخفه مره بدون ضغط .. 

ثانيا / الايلاينر ..

ايش هيا اسهل الأدوات لرسم الايلاينر؟ 

- في البدايه انصحكم تتعلمو بالقلم الجاف لانه سهل التحكم فيه وسهل التعديل .. 

وأسهل طريقه :. 

- ارسمي ثلاث نقط على خط الرموش ووصلي بينها 

وفي البدايه اكتفي بايلاينر على خط الرموش بدون سحبه لبرا.. 

طرق تساعدك لرسم الايلاينر :. 

- اهم شي انك تكوني جالسه ومركزه .

- حطي قدامك مرايه مكبره عشان كل شي يكون واضح لك ..

- ثبتي يدك على طاولته وابداي الرسم .. 

- برضو ثبتي أصابعك على خدك اثناء الرسم.. 

- ممكن في المناسبات  تحطي لصق ع طرف عينك او اي بطاقه لمن تتعودي الرسم..  

*الفرش المستخدمه لرسم الايلاينر :. 

- الفرشه المشطوفه من اسهل الفرش في رسم الايلاينر ..

- الفرشه المعكوفه حلوه وسهله في الرسم ..

- يفضّل تكون فرشه الايلاينر رفيعه عشان ماتحوسين كثير ..

نصائح :. 

- كرري محاولاتك في الرسم لين تتعودي وأفضل شي ارسمي وعينك مفتوحه 

في البدايه صعب لكن راح تتعودي ..

- استخدمي منتجات ماتسيح عشان ماتحوسك.. 

- لاتشدين عينك بقوه وقت رسم الايلاينر 

ممكن في الاخير لمن بتعدلي في رسمتك شدي لكن بشكل خفيف .. 

ثالثا :الماسكرا :

- استخدمي في البدايه برايمر قبل الماسكرا على رموشك يعطي كثافه للرموش ..

- عند وضع الماسكرا ثبتي فرشة المسكرا وانتي غمضي وفتحي عينك على الفرشه ..

- برأس الماسكرا المدبب ارفعي الرموش على فوق تعطي شكل جميل .. 

رابعا / الحواجب.. 

ايش هيا المنتجات اللي ممكن استخدمها لرسم الحاجب ؟ 

- جل ..

- باودر حتى لو كان ظل عين راح يفي بالغرض ..

- القلم .. 

نصائح عند رسم الحاجب :. 

- امشي بالفرشه على الحاجب مع منابت الشعر .. 

- عشا توزعي اي منتج على الحاجب بشكل طبيعي اعتمدي على تمشيط الحواجب .. 

- ابتعدي عن الحواجب الغامقه مره واعتمدو فقط انه نهاية الحاجب تكون أغمق من بداية الحاجب .. 

- قرب الحاجبين من بعض او بعدهم يحدد حجم الأنف يعني كل ماكانت حواجبك قريبه مره من بعض راح يبان انه انفك حجمه كبير .. 

- الوجهه الطويل الحواجب العريضه راح تكون اجمل عليهم .. 

- الوجهه الدائري المليان يبتعدو عن تعريض الحواجب افضل لهم عشان راح يعطي إيحاء انه ملامحهم حاده بزياده ..

- ابتعدو عن المبالغه وخصوصا اللمعه تحت الحاجب شكلها مو حلو اذا كثرتي .. 

- اللي من الاساس عندها شعرات زياده تحت الحاجب تكتفي بشدو ابيض مطفي .. 

بعض انواع الفرش لرسم الحاجب :. 

- الفرشه اذا كانت خفيفه شعراتها أحب استخدمها للجل عشان تأخذ كميه قليله ..

- الفرشه اللي تكون شعراتها متماسكه وقويه أحب استخدمها للباودر عشان تمسك المنتج ويكون اللون قوي .. 

- الفرشه المسطحه أحب استخدمها لمقدمه الحاجب من قدام سهله جدا وتحدد لك الحاجب من قدام بشكل كويس .. 

اخفاء شعر الحاجب :. 

*الشعر المشقر :. 

- اذا كنتي توك مشقره اعتمدي على كونسيلر لونه ابيض ويكون فقط عند كسرة الحاجب ..

- اذا الشعر المشقر مر عليه وقت وكانت منابت الشعر المخفي بدأت تطلع اعتمدي على كونسيلر لونه غامق حددي فيه الحاجب بعدين ع الكسره حطي لون فاتح مصوفر او على بياض .. 

- شخصيا فقط احدد بداية الحاجب بكونسيلر نفس لوني وكسره الحاجب أحط عليها شدو ابيض بشكل خفيف .. 

نصيحه للبنات اللي يشقرون حواجبهم :. 

- فقط شقرو أطراف الحاجب والشعر الزائد 

- غلط تشقرون الحاجب الحاجب كله او نصه بيطلع كنافه والله .. 

- دائما الأكسجين ٩٪ هو المناسب للتشقير ،، لكن البنات اللي شعرتهم خفيفه مرا تشقر بأكسجين نسبتة ٦٪ .. 

خامسا/ المحددات والارواج .. 

- افضل جدا استخدام المحدد قبل تثبت كريم الاساس بباودر عشان يكون سلس مد التحديد .. 

- من فوائد المحدد يثبت لون الروج ، ويساعدك في إبراز الشفايف  .. 

- اذا حابه تكبرين شفايفك اعتمدي على تكبير الشفايف من النص .. 

- لما تحددين الشفايف ثبتي أصابعك في وسط الذقن وابداي ارسمي عشان تكون الرسمه مضبوطه وبدون تعرجات .. 

- الروج يوضع بعد التحديد ..

- اذا حابه تسوين تدرج في لون الروج ويكون الوسط فاتح استخدمي فرشه دمج عاديه وبعد ماتحطين الروج طبطي بفرشه الدمج من وسط الشفايف .. 

- الأرواج المطفيه والثابته ضروري تكون شفايفك قبل ماتحطينها مسويه لها تقشير ومرطبتها ( زيت جوز هند او الوز او زيت زيتون + سكر ) 

سادسا / البلشر ..

- البلشر من أهم خطوات الميكب ويعطي رونق حلو للبشره .. 

- اختيار اللون المناسب هو اللي راح يخليك تحبي البلشر او لا .. 

- البشرات الفاتحه يبتعدو عن البلشر الغامق لانه راح يصير زي الضربه على خدودهم ..

- الطريقه الصحيحه لوضع البلشر يكون طبطبه لان المسح يأثر على كريم الاساس .. 

- اذا البلشر اتلطخ معاك واتكتل في مكان واحد حطي في الفرشه شوية بودره منثوره شفافه وابداي ادمجي ..

- افضل فرشه بالنسبة ليا ماك رقمها ١٨٧ موجود مثلها في كثير ماركات الحلو فيها انها تخلي البلشر طبيعي وخفيف خصوصا البنات اللي مايحبون البلشر .. 

وبكذا أكون خلصت معاكم اغلب النقاط وحابه أوضح نقطه

مو ضروري تلتزمين بكل نقطه كل شخص واحتياجه

انا شخصيا اوقات بس أحط كونسيلر وشويه برونز بكريم الاساس ع أطراف وجهي وروج

واخلص يعني مو ضروري تحطين كل شي انتي واحتياجك للشي اللي بتحطينه .. 

وأشوفكم على الف خير في تدوينات ثانيه باْذن الله ..