صباحكم / مساءكم خيير
التدوينات القادمه بإذن الله اغلبها بيكون عن
[ العنايه ] وخصوصا الوجه ،،
(وقريبا راح انزل تدوينه عن عنايتي في فترة الحمل)،،
دائما وابدا فيه اشياء اهتمامنا فيها لازم يكون اكثر
لانه حتى مع تطور ادوات التجميل والميكب مستحيل
تختفي او نخفيها ،، ومنها منطقة حوالين العين،
( الهالات ) وسهل تخفينها لكن المشكله هو الانتفاخات والتجاعيد
والخطوط مااتكلم عن الخطوط البسيطه والطبيعيه
اتكلم عن الشئ الناتج عن قلة اهتمام ،،
يعني صعبة تكونين بنت في العشرين او الثلاثين
وعندك تجاعيد تحت العين كثيره ،،
طبعا انا اوسوس من تجاعيد العين واليد ✋
مااقدر اقول كمان اوسوس من الهالات لانه بالفعل
الوراثه لها دور في هذي الناحيه صحتك ونسبة الدم
عندك كلها تأثر على الهالات اللي تحت العين
فقر الدم مع الحمل لعب فيني جديا ،، بس مايمنع
اني احاول قد مااقدر اتخلص من هذي المشكله او
اخفف من حدتها عشان انه وراثه او غيره ..
نرجع لموضوعنا كريم اليوم من NUXE
Contour des yeux Prodigieux
Anti-Aging, Moisturizing
كونتور دي زيو برودجيو
شركة ( نوكس ) شركه فرنسيه المنشأ
فلسفتهم :
ركيزتهم مفادها أنّ الطبيعة والنباتات هي أساس كل مستحضر تجميلي، وأنّ جمال المرأة هو صنيعها، وارتكزو إلى خمس مبادئ :
الطبيعيه/ وانه اغلب منتجاتهم طبيعيه من الاشجاروالنباتات
الابتكار / وعندهم منتحات كثيره اخذت براءه اختراع < المصدر من موقعهم :)
الاحساس / وتهمهم الروائح الجذابه اللي تجذب المستهلكين
امكانية وصول المنتجات للجميع / ويهمهم ان السعر مايكون غالي بالعكس يعتمدو انه يكون في مقدور الاغلبيه شراء منتجاتهم
وصف الكريم كما ذكروه :
١-سائل مغذي ومنشط للعيون
٢- قوامه خفيف وغير دهني
٣-يحتوي على حامض الهيالورنيك ومستخلص من جوز الهند
٤- من مكوناته الكافئين النباتي اللي يساعد على تقليل من مظهر الانتفاخ ويزيل الهالات.
[ من مكوناته : الشاهي الاخضر ، زهرة البندق ، فيتامينات أ و هـ ]
٥- يعطي نضاره ومرونه لمنطقة العين
٦- يناسب العيون الحساسه واللي يلبسون عدسات لاصقه بكثره
طريقة استخدام المنتج :
يستخدم على منطقه نظيفه وجافه من الماء
ابداي من جانبي الانف الى طرف الجبهه ،، < فهمتوني صح 🙏
تقييمي للمنتج وهل وصف المنتج صحيح ؟
اول شي لفتني في الكريم علبته الجميله الخفيفه جدا
ثاني شي رائحة المنتج كانت حلوه وجميله تحسي انك
تشمي مجموعة زهور حبيت ريحته تحسسك استرخاء،
الكريم بالفعل خفيف تمتصه البشره بسرعه
اول ملاحظه ليا بعد استخدامه باسبوع نضاره حلوه تحت عيني
الهالات حسيتها نفس ماهيا بس حسيت شئ يوحي بنضاره ونظافه
ترطيبه جيد جدا وحلو مااعرف عن اللي جفاف تام ف المنطقه عندهم بس انا شخصيا حبيته
حسيته يعطي مظهر انه تحت العين مشدود
لاحظت بعد اسبوعين او اكثر انه الهالات اتحسنت بشكل انا لاحظته صح مو النتيجه اللي كنت اطمح لها بس برضو حبيته
الانتفاخ مااقدر احكم صراحه لاني مااعاني انتفاخ تحت العين بس لانه يعطي نضاره ويخفي علامات التعب اعتقد راح يخفف لو بشكل بسيط من منظر الانتفاخ
بالفعل لما اكون تعبانه احس اول شي يبان فيني عيوني والمنطقه اللي حولها لما صرت استخدم الكريم لاحظت انه علامات التعب اللي تحسسك انه العين باهته ولا مغمقه زياده عن الطبيعي حسيتها اختفت بعد الكريم
لاحظت انه مكياجي تحت العين صاار افضل واحسن ،،
جربته كترطيب لشفايفي وحبيت ترطيبه خصوصا قبل الميكب لكن كترطيب عميق وكذا لا طبعا ،،
مدة صلاحيته من تاريخ الفتح ٦ شهور
هل الكريم يستحق الاقتناء ؟
بالنسبه ليا حبيته ولو مالقيت شي افضل منه راح ارجع اشتريه
متوفر في كل الصيدليات
سعره : ١٤٥ ،، صح العلبه صغيره بس نقطة من الكريم تكفيك ،،
ويارب حبيتو التدوينه وأي سؤال حياكم ،،
ليست هناك تعليقات:
إرسال تعليق