مساءكم / صباحكم قناعه
كلنا همنا اعتقد انه جسمنا دائم يكون لونه متوحد وحالتنا حاله واحنا ندور وصفات ولا خلطات عشان نصير نلق لق :)
طبعا لازم نعرف انه كل جسم يختلف في قدرته على مقاومة التغيرات والاجواء والهرمونات طبعا في ناس تلقي عنايتها بسيطه ومو متكلفه وممكن كمان منعدمه بس جسمها لونه متوحد اي كان لون الجسم ابيض او اسمر وتلقين وحده مقابله نفسها لليل نهار وبرضو تحسينها ماوصلت للنتيجه نفس البنت اللي عنايتها بسيطه لازم نعرف انه الجينات والوراثه تلعب دور مهم في كل شي وبرضو الاكل والغذاء وتجي بعدها العنايه والاهتمام والدلع دائما خليك قنوعه بنفسك وجسمك وشكلك اسعي للافضل وغيري من نفسك للاحسن حطي لنفسك جدول عنايه ودلعي نفسك قد ماتقدري مع الوقت راح تلاحظي فرق
موضوع اليوم عن سنفره من Lush
اسمها:
Rub rub rub shower scrub .
سنفره للجسم من #لاش اسمها رب رب ذي السنفره عباره عن ملح بحر اول ماتفتحي علبتها راح تحسي انك جالسه على البحر وتشربي عصير برتقال طازج 😍✌️ . ومن مكوناتها زيت الليمون وكمان البرتقال وزهرة الياسمين 💕 ومكونات كثيره ذا الشي اعطي السنفره ريحة جميله وانا جدا حبيتها ، تحسي لما تستخدميها بنظافه وانتعاش وملمس السنفره مو مره خشن لكن اثناء ماانتي تسنفري تحسيه يصير اخشن طبعا الشي اللي حبيته اكثر انه لما تغسليهاعن جسمك تصير السنفره رغوه وتنظف بسرعه عن الجسم ✌️
عيوب السنفره :
اللي ماعجبني فيها انه بعد ماغسلت جسمي طلع فيني زي الحبوب نفس قرصة النمله بس بعد نص ساعه اختفى ولا كانه فيه شي وذا الشي خلاني اقول انها ما تصلح للبشرات الحساسه جدا ، وكمان كمية السنفره اللي في العلبه احسها قليله ،
نصيحه :
طبعا يكفي انك تعملي سنفره للجسم مرتين الى ثلاث مرات واهم شي بعدها الترطيب ، طبعا بعد فتره من استخدام اي سنفره جيده وكويسه راح توحد لك لون جسمك وتشيل اي تراكمات على الجلد ،
استخدام اخر للسنفره :
الشي اللي شدني في ذي السنفره انه مكتوب انه ملح البحر يعطي حجم للشعر ويشيل الجلد الميت والقشور اللي في فروة الشعر بس ماني عارفه اذا قصدهم نصيحه عامه او على ذي السنفره ، طبعا معروف انه حتى الشعر ينعمل له تقشير 😂
تجربتي في استخدام سنفرة رب رب للشعر :
استخدمت سنفرة rub rub لشعري وعملت فيها تقشير لفروة الشعر فرقت شعري وحطيت شي بسيط وبدات احرك السنفره بشكل خفيف ع جذور شعري لاحظت انه تعطي ف الاخير ملمس نفس الرغوه بس ماكنت ملاحظه وجود رغوه ع الشعر ، طبعا اخذت فتره وانا انظف الجذور والشعر من السنفره
اللي لاحظته انه حسيت ان شعري يتنفس وفروة شعري تتنفس 😂 اعطى شعري شويه نفشه من الجذور بس بشكل حلو يعني الشعر مو لاصق لا فيه شويه فوليوم يمكن محد يلاحظها بس انتي تحسي فيها ، استخدمت السنفره وقت ماكنت حاسه ان فروة شعري مدهنه وتحتاج تنظيف طبعا تقشير فروة الشعر ماتعمليه كل شوي لا ف الشهر مره احس يكفي 👍
لاش متوفر في مدينة جده في مجمع العرب وستارز افينو ومااعرف فين فروعهم الثانيه
السعر ماعندي علم والله ناسيه لاني طلبته مع مجموعة اغراض اون لاين من متجر @glitter_beauty14
ليست هناك تعليقات:
إرسال تعليق