نصائح وخطوات للميكب المناسب للسفر ودوام الصباح

صباحكم / مساءكم اناقه وحب .. 

My instagram

(انا دائما مع مقوله وللناس فيما يعشقون مذاهب)  

ومن ضمن المذاهب اللي يختلفو عليها الناس الاذواق ومن خلال عملي واختلاطي بالناس في شغل الميكب الاحظ كيف الاختلاف في الاذواق  ،، الى الان اتذكر اني كنت اشوف ايام الجامعه بنات يجو الدوام بفل ميكب مو المشكله انه مو حلو لا بالعكس البنت ماشاءالله تلقينها شاطره وهيا تحط الميكب والمكياج نظيف ومرتب لكن منظر الميكب هذا في الصبااح ابدا مايوحي بالسعاده بالنسبه لي انا .. 

عشان كذا موضوعي هذا يعتمد ع ذوقي الشخصي مع انه انا احط اقل من الخطوات اللي راح اذكرها لكم .. 

لكن انا حبيت اني اشمل جميع الخطوات والباقي راجع لذوقك تضيفي او تلغي اللي انتي تحبيه .. 

مكياجنا اليوم ينفع للدوام وينفع للسفر برضو كمان انتي رايحه مسافره مو معقول وقتك كله راح يروح وانتي مقابله المرايه تحطين فل ميكب.. 

دائما وابدا مكياج السفر والدوام خلوه بعتمد على انه تبان البشره صحييه وفيها نظااره .. 

اهم نقطه قبل نبدا بوضع المكياج : 

١- غسلي وجهك باي غسول مناسب له ومرتاحه عليه ابتعدي عن الغسولات اللي تجفف البشره بشكل مضر اعتمدي على غسول ينظف ويزيل الدهون بس بدون تجفيف والى الان الغسول اللي ارتحت عليه هو بيوديرما كتبت عنه تدوينه سابقه .. 

٢- مسحي وجهك بقطنه فيها مويه ورد او اي تونك مرتاحه عليه .. 

٣-شطفي بعدها وجهك بمويه بارده عشان تحسي بانتعاش ويقفل لك المسامات.. 

٤- استخدمي كريم ترطيب سواء للبشره وبرضو لمنطقة تحت العين .. 

النقاط السابقه تعتبر عنايه يوميه للبشره ومن اهم الاشياء اللي تسويها عشان تضمنين ان بشرتك راح تتقبل المكياج بشكل حلو ومرتب .. 

نبدا بالبرايمر : 

البرايمر هو منتج يوضع قبل البدء بالمكياج عشان البشره تستقبل المكيب بشكل حلو وتتفادين المشاكل اللي تخرب المكيب 

هل البرايمر له انواع ؟ 

البرايمر مختلف وعالم كبير ومنتجات كثيره كل بشره لها نوع البشره الدهنيه راح يكون لها برايمر يخفف من الدهون ويتحكم فيها والجافه تحتاج لشي يرطبها والبشره اللي فيها مسامات تحتاج برايمر يخفف من منظر المسامات.. 

ايش افضل البرايمر اللي جربتيها ؟

 من الماركات اللي جربتها للبرايمر او البيس هيا بنفت وميكب فور ايفر وسماش بوكس وكلها متوفره في سيفورا .. 

حبدا ببرايمر ميكب فور ايفر :

يناسب البشرات اللي تبان مرهقه والشاحبه  يعطي اشراقه حلووه انا حبيته سهل التوزيع والدمج تقدري توزيعه بيدك او بفرشه حبيته مع الميكب حسيته يعمل فرق حلو خصوصا انه بشرتي شاحبه  ..  

سعره ب ١٠٠ ريال تقريبا ..

بعدها الحواجب  : 

اعتمدي انها تكون ع رسمتها الطبيعيه اذا شعرك كثيف ومايحتاج رسم اعتمدي فقط ع ماسكرا حواجب سواء شفافه نفس انستازيا او ملونه نفس مسكرات ماك وبنفت وغيرها .. 

حواجبك تحتاج رسم اعتمدي على شي بسيط وخفيف مثل قلم الحواجب من انستازيا او بودرة حواجب مثل انستازيا او بنفت او بودي شوب او اي لون ظل مقارب لون حواجبك شخصيا انا اوقات ارسم حواجبي بشدو ( ظلال العين ) ميت مات من ذا بالم .. 

مايحوج انه الحواجب تكون مربعه او مستطيله او لونها اسود .. 

(منتجات انستازيا تلقوها عند التاجرات او اطلبوها من موقع نوردستورم)  ..

 نصيحه : 

ابداي برسم الحاجب بخط من تحت وبعدين ابدي عبي طرف الحاجب من الاخير ومن بقايا اللون في الفرشه ارسمي مقدمه الحاجب عشان يكون اللون خفيف واعتمدي ع تمشيط الحاجب عشان يتوزع اللون ويترتب .. 

العين : 

الشدو ( ظلال العين ) 

دائما خلي لون الشدو طبيعي واعتمدي ع لون واحد واضاءه بسيطه لمدمع العين ركزي ع الالوان الخفيفه مثل اللون العسلي وممكن البني البسيط وافضل شي يكون ع مشمشي ينور لك العين ويخلي نظرتك حلوه .. اعتمدي في توزيع لون الشدو على فرشة دمج عشان اللون يكون خفيف ومدموج كويس .. 

الكحل : 

اعتمدي ع لون طبيعي لداخل العين سواء بيج او بني خفيف جدا انصحكم بكحل انستازيا البيج جدا جميل وله طرفين لون بيج والثاني جاي ع ذهبي خفيف وكلها جمييله وبرضو تقدري تحطينها اضاءه لمدمع العين او تنظفي في اللون البيج الحاجب من تحت ، الكحل البني من برجوا سعره حلوه وتركيبته كريميه وحلوه يبان من مسحه 

قلم انستازيا ب ٧٠ ريال وممكن اقل 

برجوا اعتقد في حدود ٢٠ ريال او اكثر

المسكرا : 

اذا حابه انا صراحه افضل شي خفيف وبسيط اعتمدي على عكافة الرموش عشان تثني لك رموشك بشكل حلو وطبيعي اعتمدي ع مسكرات خفيفه عشان رموشك وممكن اذا كنتي حابه في السفر تنزلي البحر او في منطقه حاره اعتمدي ع مسكرا بنفت بس من ذحين اقولكم ماتنفع استخداام يومي وتعدم الرموش لو مانطفتيها كويس 

سعرها ب ١٠٠ وشي 

او استخدمي مسكرة لانكوم دراما هابينيوس او شانيل جدا حلوه والافكت اللي تعطيه لرموشك حلوو وتقدري تحطي اكثر من طبقه ماتاذي الرموش حتى مع الاستخدام الدائم .. 

 الفونديشن ( كريم الاساس) : 

دائما احب انكم تعتمدو ف الاستخدام اليومي  على بيبي كريم او سي سي كريم شخصيا اغلب اللي استخدمتهم ماحبيتهم مررره لكن احب ارشح لكم سي سي كريم من شانيل قريت عنه تقاارير جدا حلووه وافكر استخدمه ، وبرضو بي بي كريم من ديور قريت عنه وحاطته في اللسته .. 

افضل انكم تبتعدو عن كريمات الاساس للاستخدام اليومي واذا كنتو حابين اعتمدو ع كريم خفيف ويعطي منظر حلو ومرطب للبشره .. 

مثل كريم اساس بنفت او جورجيو ارماني او ديور كلها تعطي تغطيه حلوه مو مات ع البشره ابدا وثقيله لا خفيفه وحلوه .. اكثر شي افضله بينهم هو تبع بنفت لانه كل ماطول ع البشره يزيد جمال ونظاره اهم شي اختياركم للون يكون صحيح ودائما اعتمدي ع توزيعه بالبيوتي البلندر لانها توزعه بطريقه طبيعيه وماتبين الاساس متكتل او اي شي من هذا القبيل .. 

ديور ستار ثباته اطول من جورجيو ارماني بس جورجيو ارماني يعطي زي الترطيب والنظاره .. 

جورجيو ارماني : ب ٢٢٠ تقريبا موجود في سيفورا 

بنفت : ب ١٥٠ اعتقد 

ديور ستار : ناسيه والله بكم بس في حدود ٢٠٠ ريال .. 

اعتمدي ع البودره السائبه في تثبيت الكونسيلر او الاساس .. 

او بودره شفافه مضغوطه مثل شانيل جمييله كتبت عنها بوست في الانستقرام 

الكونسيلر : 

برضو خذي شي خفيف وبسيط مثل كونسيلر نارس او ميبلين كلهم حلوه وطبيعيه افضل تبع ميبلين اكثر .. واذا حابه تعطين اضاءه وتنوير اكثر لمنطقة تحت العين استخدمي كونسيلر ديور مثل ماقلت ماله اي تغطيه لكنه يبين المنطقه منوره ومشدوده تستخدميه بعد ماتغطين الهالات بكونسيلر له تغطيه مثل ماقلت نارس او ميبلين او او فيت مي كلها تغطيتها خفيفه ماعدا نارس تغطيته عاليه .. 

برضو وزعي الكونسيلر بالبيوتي بلندر افضل 

البلشر : 

برضو الالوان خليها طبيعيه وتناسبك وتبين انه شي طبيعي افضل تستخدمون بلشرات كريميه لانها تبان حلووه ع البشره وتبان مدموجه ارشح لكم بلشرات فور ايفر الكريميه ثابته وحلووه. 

بلشر بيربري كريمي جدا حلو وطبيعي ويبان ع البشرات بشكل طبيعي ثباته اخف من فور ايفر ..  

اعتمدي انه لون البلشر يكون وردي او مشمي او لون برونزي شوي نفس تبع ماك .. 

افضل بلشرات جربتها : 

لورا مارسيه ، فور ايفر ، ماك ، بنفت ، بيربري 

وبرضو وزعيها بالبيوتي بلندر سواء كان البلشر كريمي او بودري.. 

الارواج : 

احب استخدم التنت للشفايف في الصباح مثل تنت الشفايف من بنفت 

الروج في الصباح اختاري روج اقرب للارواج الكريميه وتكون طبيعيه سواء تكون ورديه او مشمشي .. 

ابتعدي عن تكبير شفايفك وتحديدها بشكل واضح  

حطي محدد بشكل خفيف وبعده الروج واعتمدي انه تحطين الروج بشكل طبطبه ع الشفايف 

روج بربيري اقرب للقلوسي خفيف وشكله لطيف ع الشفايف احب احط قبله محدد سور من ماك لونه لحمي ع موف سعره ب ١٠٠ ريال او اكثر  .. 

ارواج ماك غنيه عن التعريف احب لون (بليز مي)  مايل ع الوردي وحلو ورايق سعرها من الموقع ب ٦٢ ريال .. 

ارواج كلور بوب اللي لونها نيود حلوه ومتعدده وسعرها ب ١٨ ريال 

واهم شي عنايتك بشفايفك عشان شفايفك تتقبل اي نوع من الارواج ويكون الروج حلو عليك .. 

عنايه سريعه بالشفايف: 

١- قشري شفايفك اكثر من مره ف الاسبوع .. استخدمي سكر وزيت زيتون وحركيه ع شفايفك بشكل خفيف .. 

٢- العسل من افضل الاشياء لعلاج مشاكل الشفايف 

٣- اي مرطب خفيف عشان دائما تكون شفايفك مترطبه وحلوه .. 

الاضاءه : 

ابتعدي عن اللمعه قد ماتقدري شكل بشرتك وهو يلمع تحت الشمس مو منظر طبيعي 

واذا حابه تحطي شي خفيف انصحك باضاءه كلور بوب خفيفه وطبيعيه استخدميها باصبعك او بالبيوتي بلندر .. 

 سعر الاضاءه ب ٢٥ ريال او ٣٠ 

منتجات كلور بوب متوفره عند التاجرات او اطلبي من موقعهم .. 

ف الاخير انهي مكياجك بانك تبخين بختين من الفكس بلس او اي بخاخ يعطي نفس المفعول 

ويارب تستفيدو من التدوينه واشوفكم على خيير 💕