صباحكم / مساءكم نشاط وجمال
ونقول بسم الله نسترجع حماس التدوين،، موضوع اليوم من زمان بكتب عنه بس الكسل الله يجازيه :/
بالنسبه ليا انستازيا من الشركات اللي جالسه تفرض نفسها في الفتره الاخيره في الساحه التسويق عندهم عالي وجميل ما اعتقد فيه ميكب ارتست ما استخدم منتجات الحواجب تبعهم او الكنتور الباودر وكلها قد كتبت عنها تدوينه وكانت من مفضلاتي
حاليا اشتريت الكنتور الكريمي
فيه منه ٣ درجات لايت للبشرات البيضاء جدا ، ميديوم للفاتحه الى متوسطه ، دارك للبشرات الغامقه ..
عباره عن 6 ألوان منوعه بين الهايلايت والكنتور
ايش يعني كنتور وهايلايت ؟
الهايلايت سبق وشرحته في تدوينه سابقه ..
راح أقولكم أيش يعني كنتور بشكل مبسط هو تحديد الملامح وإخفاء المناطق اللي ماتحبيها نستخدم فيه ألوان بنيه مايله للرمادي اهم شي اللون ما يكون مائل للاورنج ويكون مطفي ما فيه أي لمعه
شخصيا أفضل الكنتور الكريمي فقط وقت التصوير لأنه مع الإضاءة القويه تختفي الملامح الكنتور يحدد لك الملامح بشكل واضح..
أفضل الباودر لما ما يكون فيه تصوير..
شكل الباليته مع اسم كل لون :
حبدا بكل لون واستخدامه
Banana:
ذا اللون أجمل شي في الباليته بالنسبه ليا 😘
لونه جاي على صفار يستخدم تحت العين والأماكن اللي تحبي تنوريها أستخدمه دائما..
Cream:
شخصيا أستخدمه أوقات زي الكونسيلر اغطي فيه الحبوب او اي مشكله في الوجه، استخدمه هايلايت للبشرات السمراء، بعضهم يستخدموه فاونديشن مع انه جدا ثقيل انه يكون فاونديشن ..
Warm coral:
يستخدم بلشر( أحمر خدود ) او مصحح الهالات والكلف شخصيا استخدمه بلشر لونه فاتح مشمشي رايق خصوصا إذا اندمج بشكل كويس
Nude:
استخدمه كونسيلر وخصوصا للهالات وبفضله للبشرات القمحيه
Cinnamon & chocolate:
كلها تستخدم للكنتور الفاتح ممكن يستخدم برونز او كنتور للبشرات الفاتحة وشخصيا احط من اللون الغامق شي بسيط واخلط معاه اللون الفاتح عشان يعطيني تدرج و يبان أنه مدموج
رائي الشخصي عن الباليته :
الالوان متعدده والوانها جميله
تعتبر باليته اقتصاديه وسعرها مناسب
المنتج كريمي ثقيل شوي يناسب جميع للبشرات بس حبيته للبشرات الدهنيه أكثر
سهل الدمج ومايحوس معاك بالعكس أفضل من كريولاين بكثير سواء من ناحيه تعدد الالوان او التحكم فيه في الدمج
ثباته عالي مايخطط معاك أبدأ..
شفت كثير يوتيوبر خصوصا اللي بشراتهم جافه يحطو نقطه زيت من فيتامين e او اي سيروم زيتي عشان يسهل عليهم الدمج أكثر..
أيش الفرش المستخدمه للكنتور؟
اي فرشه شعرها صناعي وتكون متماسكة لأنه منتج كريمي أفضل فرش الكابوكي تبع مورفي حلوه للدمج وجميله جدا..
برضو أحب استخدم البيوتي بلندر للدمج سهله وحلوه..
هل الكنتور ضروري للكل؟
طبعا لا هو خيار شخصي وراجع لذوقك في الماكياج يعني الوجوه الصغيره ما تحتاج كنتور للوجهه ممكن تكتفي بشوية برونز على أطراف وجهها او على انفها شوية كنتور
مقارنه بين التعليب للكنتور الباودر الكريمي؟ .
حبيت التعليب الكريمي أفضل بكثير من الباودر لانه سهل تنظيف علبتها على عكس الباود تنعدم وتتوسخ من أقل شي راح تتضايقي إذا كنتي تحطي الميكب برا لانك راح تحتاجي كل فتره تنظفي العلبه من برا ..
انستازيا يوفرونها التاجرات او ممكن تطلبيها اونلاين من موقعهم ..
ليست هناك تعليقات:
إرسال تعليق