منتجات رخيصه للعنايه بالشعر | ريفيو انبولات رويال بلاسنتا

مساءكم وصباحكم حب وقناعه .. 

وعلى طاري القناعه ولله الحمد صرت كل مره يصير عندي قناعه في كثير من أمور حياتي ..

وبالفعل القناعه كنز اذا حصلتو عليه اتيسرت أمور كثيره في حياتكم .. 

القناعه في الرزق ، في الجمال ، في الذريه ، في المال ، في الصحه ، في المسكن ، 

وفي الملبس ، في زواجك ، في دراستك 

وامور كثيره في حياتنا لازم نكون قنوعين فيها حتى في أساليب عنايتنا في انفسنا ،، 

يعني ممكن وحده الله فاتح عليها ماعندها التزامات او مسؤؤليات ومتوفره عندها الماده

طبيعي بتكون كل أغراضها او منتجاتها اكثر من غيرها وممكن أغلى ،،

اللي يصدمني تجي بنت تقول طيب هيا عندها فلوس ووقت طبيعي بتكون بتعتني في نفسها وعندها من افضل المنتجات 

انا اقولكم والله العنايه ممكن تكون بكريم فازلين وزيت زيتون 

العنايه بالمتوفر عندك او حسب ميزانيتك اللي انتي مقررتها ..

ماانكر انه في منتجات غاليه بس مفعولها مره جيد ولكن برضو حطو في بالكم مو كل غالي كويس .. 

يعني انا شخصيا ماعندي استعداد مادي انه كل شهر اشتري امبولات

للعنايه بالشعر سعرها ٥٠٠ ريال ،، ممكن اشتريها شهر او شهرين 

لكن مو كل شهر عندي استطاعه ماديه ..

فقررت الآتي البحث عن منتجات اقدر اشتريها كل شهر او كل شهرين ومااكون وقتها ضغطت على نفسي ماديا وكمان برضو أكون وقتها دلعت نفسي واهتميت فيها .. 

عشان كذا كل فتره راح اشاركم منتجات مقارنه بغيرها تعتبر رخيصه .. 

منتج اليوم عباره عن امبولات لوشن مقوي للشعر بخلاصه الأعشاب ..

سعر الأمبولات :

 ٩٥ ريال ..

أماكن التوفر :

صيدلية النهدي ..  

طريقة الاستعمال  :. 

- بعد غسل شعرك بالشامبو وتشطيفه وتحفيفه بالمنشفه مشطي شعرك وفرقيه ٤ أقسام او اكثر ..

- فرعي محتويات الانبوبه على رأسك وابداي سوي تدليك خفيف لين تحسي انه الجلد والشعر امتصو اللوشن .. 

- بعدها تقدري تستخدمي اي اداه من اداوات التصفيف ..

كم مره استخدم المنتج ؟ 

من ٣ الى ٦ مرات في الأسبوع الاول والثاني وبعدها حسب حاجتك ممكن مره وحده كافيه في الأسبوع لمده ٣ شهور  ..

المنتج يوعدك :. 

- تقويه الشعر 

- زياده حيويته 

ملاحظاتي للمنتج :. 

- الكرتونه فيها ١٢ انبوبه ..

- استخدمت المنتج مده ٤ أسابيع كل أسبوع ٣ انبولات ..

- لاحظت في الشهر الاول انه فيه لمعه حلوه للشعر ..

- الشعر صار فيه حيويه مااحسه طايح وباهت لا بالعكس فيه تغير حتى وان كان خفيف ..

- من ناحية تقوية الشعر مالاحظت شي لانه مااعاني انه شعري خفيف وكذا التساقط برضو مااقدر أفيدكم من ذي الناحيه لانه من قبل استخدمه كان التساقط  في شعري مره خفيف .. 

هل بترجعين تشترين المنتج ؟ 

ايوه راح ارجع اشتريه مره ثانيه باْذن الله 

هل المنتج له رائحه غريبه ؟ 

ابدا مالاحظت اي شي لكن لون السائل اللي داخل الانبوبه غريب شوي واضح انه محتوياته أعشاب بالفعل .. 

ايش العيوب اللي واجهتيها في المنتج ؟ 

شكل الانبوبه صعب التحكم فيه لانه الفرحه اللي ينزل منها المنتج كبيره

وممكن بالغلط ينزل كل المنتج في مكان واحد في الرأس .. 

ومن أرخص منتجات الشعر هيا الزيوت وكتبت كثير هنا في 

مدونتي عنها بعض الروابط اللي ممكن تفيدكم في عنايتكم بالشعر 

الزيوت الفلبينيه :هنا

تطويل الشعر : هنا

زيت جوز الهند :  هنا

ويارب تستفيدو وأشوفكم على خير ..