كيف انظم وقتي وانجز اعمالي ..

مساءكم / صباحكم ورد وحلاو .. 

تدوينه اليوم اعتقد تناسب الاغلب وخصوصا اللي عندهم اعمال والتزامات كثيره .. 

اقدر اقول انها مو تدوينة فلسفه قد مو هيا بالفعل مفيده جدا ..

انا ام عندي 3 اطفال واعمال منزليه دائما وضعي حوسه يخلص يومي وانا ربع اعمالي ماخلصتها .. 

مشكله اطفالي يبغوني معاهم دائما من يوم ابدا اطبخ او اشتغل يبدا البكاء والصراخ ..

ف اول قرار اتخذته انه اخلص شغلي اذا نامو بس بالفعل كان تعب لانه يكون وقت نومي اساسا..

بعدها صار الوضع جدا تعب وبرضو مانحلت المشكله ..

اتفقت معاهم انه اول مانصحى نفطر وبعدها تتفرجو فلم او اي شي وتسيبوني انا اشتغل 

وراح يكون فيه مكافاءه للي يهتم في رمي 

مناديله وتريب اشياءه الخاصه .. 

وعملت لهم لوحه قوانين كان من ضمن القوانين عدم البكا والاهتمام في نظافة المنزل وكنت اي 

احد منهم يخااف قانون ياخذ اشاره خطا والعكس اللي يكون هادي ونظيف نحط له علامه صح ..

الحمدلله وقتها ضبطتهم شوي واتعدل الوضع كثير ..

بقي انا كيف اقدر اهتم بالاعمال من ناحيه الطبخ الغسيل الكوي وترتيب البيت ..

اول شي عملته قسمت الاعمال الى 3 مهام 

مهام يوميه و مهام اسبوعيه و مهام شهريه ..

بدات اكتب المهام والاشياء اللي لازم انجزها ..

وصرت اكافي نفسي على نهاية اليوم او الاسبوع بشي بسيط مثل اتابع فلم او اسوي لنفسي حمام مغربي 

او اكل حلى مو لازم تكون اشياء ماديه مو دائم الفلوس متوفره ..

طبعا تقسيم المهام تكون مهام منزليه او مهام عائليه او مهام شخصيه لنفسي وعنايتي عشان ماانسى نفسي في ظل الاعمال الكثيره 

لمن تبغين تنجزين اشياء كثيره او تبغين كل شي يكون بيرفكت انسي الطلعات الكثيره اليوميه لانها تاخذ من وقتك كثير 

برضو الزيارات الدائمه تستهلك من وقتك كثير شخصيا حتى الزيارات جدولتها مرتين في الاسبوع عند اهلي..

 وكل فتره كذا اسوي زياره لبيوت قرايبي الباقيين ..

شخصيا استخدمت اللوحه لانها قدامي حسيتها احسن من الدفتر اللي يكون مو قدامي ..

لانه وانا رايحه وانا جايه هيا ف وجهي تذكرني بشغلي ..

من الاشياء اللي تساعدك في اتمام مهامك :

لاتكومي الشغل ابدا مهما كان قليل 

اطلبي المساعده من اي احد في الاعمال الصعبه خصوصا وقت التعزيل 

واذا عندك ميزانيه اشتري غسالة صحون وبرضو النشافات الحراريه للملابس ( انا ماجربتها بس كثير قالو تختصر وقتك ) 

ابداي باعمال بسيطه خصوصا في التعزيل مثلا : 

( كنت ناويه ترتبي دولاب المطبخ كل يوم حددي جزء بسيط في تعزيله 

ماراح يجي اخر الاسبوع الأ وانت خلصت كل المطبخ ) 

المهام الشهريه في تقسيمي 

عباره عن امور للمنزل ومشتريات ابغى انجزها في الشهر لانها تعتمد على ميزانيه ومبلغ مادي 

هذي الطريقه تقدري تنفذيها في اشياء ثانيه مثلا في ختمة القران او في جدولة اي شغل خاص 

او في حل واجباتك لو كنتي طالبه ممكن في الطبخ وتحديد الاكل خلال الاسبوع وغيره 

يعني تغيري تقسيمتك حسب وضعك ..

كتابة الامور فادتني كثير لانه صايره انسى مره كثير وهيا تذكرني وتنظمني اكثر ..

جربوها مااعتقد راح تخسرون شي .. 

ونشوفكم على خير في تدوينات جديده يارب ..