طريقة صبغ المنزل وبعض النصائح لاداء المهمه بشكل ناجح

مساءكم / صباحكم روقان وشوية سناعه .. 

بدايه يوم جميل اتمناه لكم يارب ولجميع العالم 

قبل اي عمل شاق اعتمد على فطور يعطيني طاقه عشان مااتعب في منتصف العمل 

من روتيني الجديد اللي اضفته حبوب القمح مع بذور شيا وشوية فواكه وعصير طازج 

اذا ماوجد العصير الطازج استعيض نيابة عنه بعصير كي ديدي جيد وصحي وافضل الاشياء الموجوده في السوق

من سنوات كنت اقول لزوجي خلينا نغير جو يوم واحنا بنفسنا نصبغ جدران البيت بويه

وكان يحطمني يقول ايش عرفك وترا مو سهل مره وتعب .. لمن يأست منه

وقبل فتره غيرت جزء من الوان جدران البيت وكلفني شغل العمال مبلغ ..

بعدها حلفت انه انا راح اكمل الباقي بنفسي

وشفت اروى الكيوت قبل فتره صبغت جدار بيتها قلت مايبغالها والله وعزمت امري

وقلت لزوجي واصريت على رائي قلت له ماراح انتظر اكثر تبغى تساعدني مرحبا فيك

ماتبغى انا متكفله بكل شي ههههه الحمدلله انه ساعدني

ايش نحتاج لصبغ الجدران :

بدايه نحتاج لصق عشان نلصق اطراف الاماكن اللي ماتصبغ ..

برضو نحتاج نايلون كبير نغطي في الارضيه انا استخدمت سفره بس ماانصحكم فيها ابدا ..

اساس مائي قبل البويه ..

بويه  اللون والنوع اللي تفضلينه ..

فرشه ..

مااعرف ايش اسمها بس الفرشه اللي تجي بعصا زي الرول موجوده في الصوره  ( يفضل انه العصا تتحكمي بطولها من ناحيه انك تقصيرها او تطوليها )

الطريقه اللي اعتمدتها وحسيتها سهله :

بداية استخدمت اساس مائي لونه ابيض خفيف نصبغ فيه كل مكان نبغى نحط عليه بويه فائدته : يخفف من  اللون السابق على الجدار يسهل انه البويه يمسك لونها في الجدار بسهوله ..

نترك الاساس ساعه بسرعه ينشف ماياخذ وقت مده سهل اسهل من البويه بكثير

بعدها نبدا نمد االبويه لكن قبلها في كثير من الصبغ يحتاج تخلطينه مع شوية مويه

اسهل طريقه عند خلط البويه مع المويه :

طبعا نخلط الصبغ مع مويه عشان بصير قوامها اسهل في المد واسرع 

نحتاج علبه فارغه نفرغ فيها الصبغ من علبته

بعدها نحط تقريبا 3 اكواب مويه كبيره  لو كان علبة الصبغ صغيره وممكن اكثر

وابداي امزجي الخليط اذا حسيتي انه مازال ثقيل ارجعي حطي كميه مويه .. 

طريقة المد :

نحط الرول او الفرشه في الصبغ ونترك شويه ينزل الزائد بعدها

نبدا نمد الاساس او البويه على الجدار صعودا ونزولا في حالة الرول 

لكن عند استخدامك الفرشه يفضل يكون باتجاه واحد 

الفرشه الصغيره تستخدم للزوايا واطراف الجدار والاماكن الضيقه 

من اهم الاشياء عند الصبغ لازم تنتبهي لها : 

 كميه الصبغ اللي يكون في الفرشه مو كثير عشان ماتحوسين في مدها 

طريقة المد يكون صعودا ونزلا لين تنتهي من مد الكميه اللي في الرول 

واهم نقطه تنتبهي لها تلبسي لبس قديم وشوز قديم وقفازات مع انه البويه تنظف من اليد تماما 

واذا حبيتو تصبغو السقف كمان البسو قبوع او كيس نايلون عشان شعرك.. 

بالنسبه ليا صبغت السقف بدايه بالرول لكن كان جدا متعب بعدها  اخذت الفرشه وصبغت فيها السقف كامل 

مع وجود سلم طبعا وحتكوني طالعه نازله طبعا بس كويس اصلا الرياضه جيده ..

هل الصبغ سهل او لا ؟ 

ماابغى اقول سهل مره لانه يختلف لمن تصبغي جدار واحد ومايكون فيه جبس في السقف

عن لمن تصبغي مساحه كبيره مع السقف وغيره 

شفتو اللي يقولو انه سهل ممتنع هو كذا

بس شي مره جميل وكمان غيرنا جو وخليت اولادي الكبار يصبغو معانا واخذنا صور حلوه 

خصوصا في عند صبغ الاساس المائي لانه سهل وانبسطو

اطفالكم الصغار طلعوهم من البيت افضل او يكونو في مكان شويه بعيد

مع انه الصبغ حاليا صار بدون رائحه او رائحه لاتذكر

الله يرحم ايام زمان اذا احد صبغ بيته الحاره كلها تعرف وننكتم كمان  

 باذن الله بس انتهي من المكان اللي صبغته وارتبه راح اوريكم صور له قبل وبعد عندي افكار كثيره ولسا مااستقريت اكتشفت اني 

صعب ذوقي في الاثاث لكن صراحه موقع 

pinterest 

ساعدني  كثير ورتب افكاري ..

وباذن الله نشوفكم قريب في تدوينه جديده